EDITORYAL - Nagpabaya lang

Daghan ang nakapangutana kun unsa na’y trabaho karon sa mga sakop sa City Hall Clearing Team nga gitawag og Prevention Restoration Order, Beautification Enhancement, kon PROBE.

Natandi sa katawhan nga mura’g gubot na man hinoon ang mga aseras dinhi sa dakbayan sa Sugbo ubos sa administrasyon ni Cebu City Mayor Tomas Osmeña.

Nabantayan nga gipasagdan lang sa mga sakop sa PROBE ang mga angayan unta nila nga aksyonan ug kuhaon diha sa aseras, ilabi na kadtong anaa gyud sa karsada nga nakahasol sa pag-agi sa mga sakyanan.

Kun ang mga sakop sa PROBE molibot lang gyud sa lainlaing dapit sa dakbayan sa Sugbo ug igmaton ang ilang mga mata, daghan kaayo sila og mahimo nga makatabang aron mapahapsay ang trapiko.

Sa dalan Colon duol sa Pelaez, sayo pa gani sa hapon daghan na nga mga tindera’g pagkaon nga moukopar na sa usa ka “lane” sa karsada kay butangan nila og mga lamesa ug karomata, ug anha sila magluto’g pagkaon.

Ang mga sakyanan maglisud na pag-agi diha kay usa na lang ka “lane” ang maagian. Gipasagdan ra kini sa mga sakop sa PROBE nga mura sila’g mga buta nga wala makakita.

Daghang mga aseras dinhi sa dakbayan nga gigamit lang sa mga tag-iya og panimalay nga gibutangan og ilang mga butang ug dili na maagian og mga tawo.

Ang mga tawo anha na lang molakaw sa karsada nga makabalda sa dagan sa mga sakyanan. Ang PROBE team dako kaayo’g katungdanan apan kun sila maglinigoy lang, usik lang gyud ang kuwarta nga gisuweldo kanila.

Ang mga opisyal sa VECO ug mga telecommunications companies, angay usab nga ilang ipadaplin ang ilang mga poste nga anaa magbarug sa aseras ug ang MCWD mokuha sa ilang mga water meters nga anaa gibutang sa aseras nga makabalda sa pag-agi sa mga tawo.