Rice Up Pilipinas

Samtang nakatutok ang katawhang Pilipinhon sa gipanghimo sa administrasyong Duterte sa kampanya batok sa illegal nga drugas, mga imbestigasyon sa Kongreso mahitungod sa extra-judicial killings ug negosyo sa drugas sulod sa National Bilibid Prisons, hinaot dili mataligam-an ang uban pang suliran sa Pilipinas nga nagkinahanglan og mas igong pagtagad ug suporta.

Kudos sa Philippine Rice Research Institute kon PhilRice ubos sa Department of Agriculture sa mga pagtuon nga ilang gipasiugdahan ug gisugdan na sa pagpatuman.

Bag-o pa lang gilusad sa PhilRice ang programang Rice Up Pilipinas. Tumong sa maong programa nga magkahiusa ang mga Pilipino sa kausaban sa matang sa pagpananom og humay.

Subay ini ilang gilusad ang duha ka basakan nga may desenyo sa mga panagway nilang Presidente Rodrigo Duterte ug Bise-Presidente Leni Robredo didto sa PhilRice Central Experiment Station sa Nueva Ecija ug sa PhilRice Branch sa Los Banos, Laguna ang D30 nga basakan.

Buot ipaabot sa PhilRice  ang panginahanglan sa pagpasaka sa produksyon sa humay ug ang pagkab-ot sa seguridad sa suplay sa bugas pinaagi sa subsob nga mga pagtuon ug pagpalambo sa mga programa sa agrikultura.

Ang paggamit sa panagway nilang Presidente Duterte ug Bise-Presidente Leni Robredo sa maong kampanya ilang nakita nga epektibong pagdani sa publiko sa pagtabang ug paghiusa nga makab-ot ang target.

Nunot sa daghang problema sa agrikultura sama sa climate change, kakuwangan sa suplay sa bugas, nagka-edaran na nga mga mag-uuma ug ang nagkamenos nga mga enrollee nga nagkuha og mga agriculture-related courses gipanghinaot sa PhilRice nga sa ilang paggamit sa mga panagway sa duha ka lider sa nasud mas madasig ang mga batan-on ug ikonsiderar pagpili ang kurso sa agrikultura ilabi na sa pagpananom og humay.

Ang pagkamag-uuma dili angay nga yam-iran ug ipagamay tungod sa kabug-at sa ug ka-importante sa maong matang sa propesyon. Naa sa kamot sa mga mag-uuma ang kaugmaon ug ang kahimsog sa usa ka nasud. Ang busog ug himsog nga katawhan maoy timailhan sa usa ka lagsik ug malambuon nga nasud.

Hatagan sa igong  atensyon sa sektor sa edukasyon ang pagpaamgo sa mga kabataan sa ka-importante sa panguma ug sa sektor sa patigayon nga dili isakripisyo ang sektor sa agrikultura tungod ug alang sa industriyalisasyon nga mao ray atong gituohan nga sulbad sa kapobrehon.

Hinaot nga samtang linga ang gobiyerno sa pagsulbad sa problema sa nagkalig-on nga sindikato sa drugas hatagan sa igong suporta ang gipasiugdahan sa atong mga scientist, inventors ug researchers sa pagpalambo sa labing batakan nga panginahanglan sa katawhan nga mao ang kabusog sa tiyan.