Bugnay ug ang bata

Sugdan nato ang adlaw sa tingtrabaho sa paghisgot sa mga butang nga gaan sa atong paminaw inay mga isyu nga bug-at ug luod na sa atong ginhawaan sama sa patayan sa katilingban, kurapsyon, ug word war tali sa mga opisyal sa kagamhanan.

Niadtong Biyernes nakahapit ako sa tabo atubangan sa Cebu City Hall diin nagkadaiyang utanon ug prutas ang gipamaligya. Apan usa ka prutas ang nakapatulo sa akong laway nga wala nako damha nga makita nga ibaligya sa sentro sa dakbayan sanglit katkaton ra man ni sa mga bata didto sa probinsya kakompetensya ang mga langgam.

Elementarya pa ang kataposan nakong tilaw sa Bugnay maong  gibati nako ang excitement sa pag- kakita nako sa prutas diin ni-flashback sa akong panumduman ang akong childhood memories nga puno sa kalipay uban sa akong mga higala kaniadto nga maglumbaanay sa pagkatkat sa punoan sa Bugnay.

Magkulismaot among nawong ug magtubod ang laway sa kaaslom sa prutas nga among iduom sa baba nga walay asin apil liso tonlon.

Ang pagbalik lantaw sa ilang pagkabata ang nakaagni sa mga tawo sa pagpalit sa Bugnay nga bisan og tag 40 pesos ang kilo, hinoon pwede ra makapalit og 1/4. Adunay 60 anyos nga babaye akong naestorya pwerti niyang lipaya nga nakakita sa prutas nga paborito niya kaonon samtang nagbakero ug baka dihang bata pa siya.

Ingon niini ka yano apan tugob sa kamaya ang kinabuhi sa mga bata kaniadto. Magdinakpanay sa sapa, maglumba sa pagpadagan sa kabaw ug uban pa nga mga inato nga dula.

Apan ang mga bag-ong tubo nga gitawag og millenials wala na makaila sa Bugnay, inay mga grapes, apple, ug uban pa nga imported fruits kinaham. Mga gadgets na ang gikalingawan inay mga inato nga dula uban ang mga higala.

Ang mabasol niini ang mga ginikanan ra usab nga mipatuyang sa paghatag kun unsay uso ngadto sa ilang mga anak. Ako guilty sab niini. Lahi na kaayo ang moderno nga panahon nga halos tanan nimong gusto instant naa dayon apan dili nako ikabaylo ang mabulokon nako nga kasinatian kaniadto ug sa unsa ang uso karon.