Paghandom ni Arsobispo Camomot
Uban ang paglaom nga nagkaduol na ang iyang beatification, timan-an sa nagkalainlaing kalihokan sa Artsidyosesis sa Sugbo ang ika-28 nga sumad sa kamatayon ni Arsobispo Teofilo Camomot ugma, Septiyembre 27. Gitun-an karon sa mga eksperto sa Simbahang Katoliko ang dul-an sa gatos na ka testimoniya sa iyang talagsaong mga buhat sa kaluoy, katakos sa pag-ayo sa mga masakiton, pagpakita sa duha ka dapit sa usa ka higayon ug paghimo og mga milagro.
Gisubli ang mga testimoniya human nitugot ang Congregation for the Causes of Saints sa Roma sa pagsugod sa proseso sa beatification ni Camomot. Kun mapamatud-an ang mga testimoniya isumiter dayon sa Vatican nga mohimo og laing hugna sa pakisusi.
* * *
Una kong nakaila ni Arsobispo Camomot tungod sa iyang pag-umangkon, si anhing Wilfredo “Baby” Camomot, ang tagduma sa Masaradyo nga maoy nag-umol og mga programa sa DYRF, diin ko nagtrabaho sa unang tunga sa dekada 90, pila pa lang ka tuig human sa kamatayon sa arsobispo.
Matud ni Sir Baby matag higayon nga mopauli sila gikan sa biyahe sa Estados Unidos ug ubang kanasuran ila gyung dad-an si Arsobispo Camomot og mahalon nga mga sinina, karsones, sapatos ug relo. Apan sa ilang atubangan ipanghatag dayon sa iyang uyoan ngadto sa iyang mga sakristan o ni bisan kinsang naatlang kuyog niya sa ilang pagduaw.
* * *
Gawas nga nalain nga gipanghatag lang dayon sa laing mga tawo ang ilang mga gasa, naluoy sab sila kay kasagaran maabtan ang ilang uyoan sa kumbento nga nagsul-ob og pughaw na ug usahay gani gision na nga kamisin ug karsones ug hawa sa bisan unsang alahas ug kaluho.
Lahi ni Sir Baby di maayong manulti ni mopasabot si Arsobispo Camomot. Apan ang iyang gipakita sa iyang mga paryente mas lantip pa kay sa bisan unsang maayong pagkalalik nga wali: Salamat sa inyong gasa apan dunay mga tawo nga mas nagkinahanglan sa inyong tabang.
* * *
Nahinangop kong nakadungog ni Msgr. Trinidad Silva, nga nakauban ni Arsobispo Camomot sa Pardo ug paisano niya sa Carcar, nga nihinumdom sa iyang misa gahapon og mga insidente sa talagsaon niyang kamanggihatagon:
Dihang nisugyot nga dasigon ang mga makililimos pagpangita og trabaho inay ihurot og hatag ang ilang kolekta sa mga misa sa parokya sa Sto. Tomas de Villanueva, giingnan siya, “Di (Dadi ang angga ni Silva), trabaho baya sab ning pakilimos, lisod sab nang trabahoa uy.”
Dihang giingnan sa iyang mga sakristan sa Carcar nga mahimong sayop ang iyang kamanggihaton kay kalima na siya baligyai sa samang bugkos sa sugnod (nga gikawat sa mga mapahimuslanon human dad-a sa kusina sa kumbento), igo lang nipasabot, “mas maayo tingaling masayop ko sa pagpanghatag kay sa masayop ko sa di pagpanghatag.”
* * *
- Latest
