EDITORIAL - Taktika ra kini

Nangayo og unom ka buwang lugway si Pres. Rodrigo Duterte sa iyang kampanya batok sa ilegal nga drugas bisan wala pa mapupos ang tulo ngadto sa unom ka buwan niyang gipanaad nga puohon kini ug ang krimen.

Iya usab gianunsyo nga moabot og 4 milyones ang gidaghanon sa mga drug addicts karon sa nasud sa naghinapos lang nga buwan sa Septiyembre.

Ang impormasyon ni Duterte matud pa iyang gibase gikan sa Philippine Drug Enforcement Agency nga nag-ingong adunay 3 milyones nga drug users sa Pilipinas atol pa lang sa iyang paglingkod sa Malacañang.

Ang 700 mil mao kadtong mga boluntaryong nitahan sukad nga gisugdan ang Oplan Tukhang ug Oplan Double Barrel. Gipuno kini sa 3 milyones imbes nga ibanan.

Sa ato pa kadtong 3 milyones nga una nang gitug-an sa PDEA hangtud karon padayon pa gihapon sa ilang bisyo bisan pa sa gipangusgang kampanya diin daghan na ang nadakpan ug napatay nga drug suspects?

Daw lisud kining tuohan, daghan na ‘sab sa mga bigtime drug lords hasta ilang mga protectors ang na-neutralized ug kadtong wala pa madakpi imposibleng wala maapektahi ug nigara pa hinuon?

Wa siguro mabantayi ni Duterte nga ang iya mismong mga lokal nga kapolisan mianunsyo man nga nagnihit na ang suplay sa illegal nga drugas ug gani nilayat na og maayo ang presyo niini.

Tungod usab niini, nakahig pag-us-os ang ubang mga krimen sama sa pagpanulis, pagpangawat, rape ug uban pa.

Tinuod aduna pay mga barangay nga aduna pa gihapoy dakong problema sa illegal drugs apan dako na kaayo karon ang kausaban kun itandi kaniadto. Ang adik kaniadto maoy hawod, apan karon nagpaitoy-itoy na lang.

Way dautan sa gipangayong lugway ni Duterte, taktika ra niya kini aron dili mokompiyansa ang tanan kay hangtud nga naa pa ang apparatus sa illegal drug trade magpabilin kining hulga sa kaugmaon sa nasud.