EDITORYAL - Sayon litukon, lisud buhaton

Sayon litukon apan lisud buhaton. Mao kini ang kamatuoran. Sama na lang niining paghagit ni Presidente Duterte sa mga investors gikan sa ubang nasud nga namuhonan dinhi nga maayo pang molayas sila kun nahadlok sila sa iyang mga polisiya ug pagsige’g pamalikas.

Dili basta motingog ang sektor sa mga magpapatigayon kun wala gyud nila mabatyagi ang epekto sa pagsige og pamalikas sa pangulo diin hasta ang mga lider sa ubang nasud ug mga organisasyon nga nakatabang sa ekonomiya naigo.

Nanganti pa si Duterte nga mahimo ra siyang makig-alayon sa Russia ug sa China. Sa nakalabay’ng mga dekada, wala mahitabo nga kaparehas og relasyon o pakignegosyo sa Pilipinas sa maong mga nasud kun itandi sa Western bloc countries.

Kini gumikan kay sila mga komunista ug na-align ang Pilipinas sa pundok sa West, samtang kadtong mga komunista gitawag man nga Eastern bloc.

Ang Russia bag-ohay lang nibiya pagka-komunista, apan kasagaran sa mga opisyal niini, sama sa ilang presidente nga si Vladimir Putin, produkto pa sa komunismo. Ang China komunista pa gihapon ug mayoriya sa mga Filipino ang dili ganahan kanila.

Kining mga magpapatigayon sa Pilipinas kasagaran nagbaligya ug nag-angkat sa ilang produkto sa West. Ang kadaghanan kanila gikan didto o may inpluwensya gikan didto.

Dili sayon nga mopahawa sila dinhi kay dako ang epekto niini sa ilang negosyo, apan wala magpasabot nga dili imposible kun lisud-lisuron sila.

Kun mahitabo kini, wa’y laing mag-antos, kun dili, ang mga Filipino nga mawagtangan og mga trabaho, magkanit-kanit kini paubos kay maapektohan man usab niini ang mga kompaniya nga nagsalig kanila. Ang epekto moabot bisan sa mga sari-sari stores kay wa nay mamalit kay wa nay mga trabaho ang mga silingan. Sa samang rason dili basta makasulod dinhi ang mga kapitalistang gikan sa Eastern bloc. Pipila ra man ka nasud ang malambuon og ekonomiya o negosyo gikan sa maong pundok kun itandi sa West.