Lumba sa chat apps

Kasagaran sa mga teknolohiya sa komunikasyon nga nidominar karon sa kalibutan naggikan sa kasadpan, labi na sa Estados Unidos. Apan ang kanasuran sa kalibutan, nga igo na lang nisunod ug nisagop sa teknolohiya, nakakita og mas dakong kapuslanan nga nakapakugang bisan sa higanteng mga kompaniya nga nagmugna sa mga teknolohiya.

Mao ni ang nakaplagan sa Google sa ilang paglusad og kalibutanong pagtuon pangandam sa paghimo sa labing bag-o nilang chat application, ang Allo. Naila-ila nila ang gamay’ng negosyante og potato chips sa Indonesia nga nihimo sa tanan niyang transaksiyon pinaagi sa messaging; Indonesian nga fashion designer nga nangolekta og mga sangkap ug nagpada og mga desinyo pinaagi sa SMS; ug babaye sa India nga nakakuha sa tanan niyang balita gikan sa group chat.

* *  *

Lahi kaayo ang panglantaw sa messaging sa mas industriyalisado nga kanasuran, nga naanad sa paggamit sa desktop ug applications. Mga molupyo sa kanasuran nga nidiretso paggamit og smart phones linaktawan ang personal computers nakadiskubre dili lang sa labing karaan nga kapuslanan kun dili hasta sab ang umaabot sa teknolohiya.

Ang kahibulong sa mga representante sa Google napulihan hinuon sa lunlon nga pagdayeg. Nahatagan sila og ideya unsa diay ang uban pa nga posibleng kapuslanan nga angay’ng tubagon sa umaabot nilang messaging app.

Apan sa dili pa makabuylo og panghambog sa bag-o nga mga katakos sa ilang Allo, angay’ng moyukbo kini sa mas hinog ug mas gamhanang apps sa mas karaang nasud sa Asya -- ang China.

* * *

Kansang labing popular nga messaging app, ang WeChat, nipalili sa unsay umaabot: Maka-chat ka sa minilyon ka negosyo, maka-order gikan nila ug makabayad nila sa wa’y pagbiya sa app; makapadala og kuwarta sa ubang users; makahimo og reservation sa kan-anan ug makatawag og taxi (nga gikopya na karon sa Messenger sa Facebook).

Ang WeChat nga maggamit sa Android, iPhone ug Windows phones nahimo na nga ganghaan sa tanang kalihukan nga digital sa kapin sa bilyon ka users sa sud sa China ug 700 milyones ka users sa gawas sa China.

* * *

Gilusad sab sa WeChat niadtong Abril ning tuiga ang tinuyo nga app alang sa mga kompaniya. Gawas sa naandan nga features, gitugotan sa app ang mga kompaniya ug ilang mga trabahante pagsubay sa nahibilin nilang leave benefits ug mga bayranan nga maulian sa kompaniya, pag-aplay alang sa bakasyon ug pagrehistro sa pagsugod nila og trabaho.

Klarong naibog sa abante nga features sa WeChat ang higanteng chat apps sa Estados Unidos, sama sa WhatsApp ug Messenger sa Facebook, Viber ug Allo sa Google. Sa mosunod nga mga buwan makasaksi kita sa lumba sa pagtanyag sa mga serbisyo nga labing sayon, malukpanon ug, tungod sa kalibotanong mga hulga sa hackers, labing luwas.

([email protected])