Brgy Guinsay, Danao City

“Mr. Barangay amo lang unta ireklamo ang silingan namo diri nga way batasan kay magpatukar man gihapon sila bisan tunga nang gabii. Hinaot nga hatagan nig dinalian  pagtagad kay hasol kaayo diri namo."

Brgy Bahay, Sibonga, Cebu

“Mangutana lang mi kun pwede ba diay ang polis maoy magpasiugda og tigbakay diri sa among barangay kada Huwebes. Gahi kaayo ni pulisa Sir kay kapila na kini siya gibalhin og police unit kay grabi ka badlungon.”

Brgy Lagunde, Oslob, Cebu

“Duna mireklamo bahin sa alad sa baboy diri sa among silingan kay baho kaayo dugay naming nag-antos ani. Maayo unta’g aksyonan kini sa municipal health office aron mahunong ning pagpabaya sa among silingan.”

Brgy Pardo, Cebu City

“Mangutana lang unta mi sir kun nganong halos dili man kuhaon ang mga basura diri. Karon ra man ni nahitabo nga gipasagdan na lang ang pagkuha sa mga basura diri sa among barangay.”

Brgy Pagsabungan, Mandaue City

“Diri sa among lugar wala man gyud mous-os ang pletehan sa tricycle diri itandi sa ubang mga barangay, hasta pud ang mga habalhabal driver kay pwerte kadagko pangayo sa plete labi na panahon sa gabii.”

Brgy Tabla, Liloan, Cebu

“Diri sa amo wala man gyud mahadlok ang mga adik ug pusher diri daghan man gihapon sila. Gusto gyud tingali ni silang masampolan ni Presidente Duterte para mahunong na ang mga badlungon diri sa among lugar.”

Brgy Abucayan, Balamban, Cebu

“Ngano man ning karsada diri sa among barangay daghan man kaayo ang giali sa kilid daghan intawon ang naproblema sa pag-agi sa kilid labi na sa mga bata nga adto na lang tadlas sa karsada agi kuyaw maligsan simbako sa mga sakyanan.”

Brgy Malones, Dalaguete, Cebu

“Diri sa among barangay daghan pa man ang namaligya’g shabu bisag naa nay bahad atong presidente nga pasurenderon ni sila. Ang nakaparat lang sad sir kay mga polis diri wala man sad maninguha para masulbad ang problema sa ilegal nga drugas diri.”

Brgy Labogon, Mandaue City

“Nganong wala man  tawon ni badlonga ang nagpasiugda sa swertres diri sa Sitio Sta Cruz? Di ba ilegal man ni Sir basta dili iya sa PCSO ang programa, pero nganong wala lagi nagpakaisog pagbadlong sa nagpasiugda diri sa swertres?”

Brgy Poblacion, Cordova, Cebu

“Naay gitrabaho nga karsada gikan diri sa among barangay padung sa menteryo dugay na man unta ni gisugdan pero hangtod karon wala pa man gihapon tiwasa’g trabaho. Lisod ila style pagtrabaho kay ultimo trysikad maglisod pag-agi sa karsada.”

Brgy Cantibas, Balamban, Cebu

“Wala man gyud manumbaling ang kapitan namo diri hasta iyang mga konsehal bahin sa problema sa daghang mga langaw tungod sa poultry diri kuwang sa atiman maong ang mga langaw pwerteng daghana.”

Alang sa inyong mga reklamo text lang sa 09326425494