Ug milayat si Dave

Nakugang si kanhi Mayor Michael "Mike" Rama sa pagbiya ni Konsehal Dave Tumulak sa iyang partido. Mao kini  ang rason nganong dali nga mipatawag sa iyang mga kaalyado sa politika ang kanhi mayor.

 Ako nagtoo nga mao usab kini ang rason nganong wala na modayon sa pagbiya paingon sa gawas sa nasud si Mike.

Bisan og wala na kami magkita si Mayor Mike apan nabasa nako ang kasakit nga iyang gibati sa pagtalikod ni Dave kaniya. Si Konsehal Dave Tumulak pinangga niyang konsehal maong gihatagan niya kini og suporta sa tanang gipanghimo apan wala pa gani moabot ang tuig human sa iyang kapildihan gibiyaan na siya sa usa niya ka sinaligan.

Ang pagbiya ni Tumulak sa kampo sa Team Rama wala na nako ikahibulong tungod kay sa panahon pa lamang sa piniliay daghan na ako og nadunggan nga atoa na kini sa pikas kampo apan gibaliwala lamang kini sa partido. Karon nakonpirmar na gayod ang mga huhungihong.

Dili nako mabasol ang konsehal sa iyang pagbiya sa partido ni Rama tungod kay gitan-aw usab sa konsehal ang iyang ugma sa politika. Gusto lamang mapreserbar niini ang iyang ugma sa politika ug ang pagbiya sa partido ug ang pagdeklarar sa iyang kaugalingon nga independente mao ang iyang napili nga lusot apan kun unsa ka dali ang pagbiya ni konsehal Tumulak ni Mike mao usab unya kini ang kadali sa iyang paglayat ngadto sa kampo ni Mayor Tomas Osmeña nga maoy utok niining tanan.

Kinsa ang mosunod ni Dave? Sigun sa akong lista mosunod sila si konsehal Hanz Abella ug Jerry Guardo sa norte nga distrito. Unsa man pud kaha ang ilang rason? Gisamokan na sa politika? Kun mao gihapon ila rason maayo pay mangundang sa politika kay samok man kaha kini.