Inig mata tubig dayon imna

Ang lawas nato way kalainan sa sakyanan nga tibuok adlaw gipadagan unya inig garahe nga papahulayon. Unya  himuon ang pagtan-aw sa kahimtang niini kun wala bay kakulian, para iandam nga makasugakod sa sunod pagbiyahe.

Mao usab ang lawas, tibuok adlaw kini gihago sa inadlaw natong gimbuhaton. Busa sa kagabhion, kinahanglan nga makatulog kini'g maayo. Samtang kita nagpahuway ang lawas usab padayon nagtrabaho ang mga sistima niini. Giabunohan ang kakulangan, gipahiluna ang kahimtang sa mga selyula nga giseguro nga nahatdan kini'g nutrens. Ang mga sundalo sa lawas kugihan kaayong nanglimpyo sa mga toksik aron kini iandam nga ikapagawas.

Mao nga sa buntag human nato'g bulay-bulay o pamalandong, mobangon dayon nga moinom og 2 ka basong tubig sa dili pa mamahaw aron mapuwersa nga makaihi kita ug mapagawas ang napundong hugaw sa sud sa lawas. Kun mahimo daghanon ang pag-inom og tubig  kay nagsilbi sab kining sugnod nga enerhiya (fuel) ug pampabugnaw sa  lawas aron kusgan kinis mga kalihokan.

Ilabi na, 30 mins human sa pag-inom og tubig, mamahaw kita'g mga pagkaong masustansyado, mosamot kabaskog nga makalahutay sa trabaho alang sa tibuok adlaw. Gikinahanglan sa lawas ang tubig gikan sa 8 ka baso ngadto sa 2 ka litro o kapin pa kutob alas 8 sa gabii lapas niini maguba na ang maayong tulog mo. Kinahanglan inig-alas 10 sa gabii, nahinanok na kita. Matud pa mas molahutay ang kinabuhi kun husto tas tubig  bisa'g kulang sa pagkaon. Apan kun husto sa pagkaon unya kulang sa tubig, daghang depekto ang madebelop sama sa kaluya ug kahinay sa lihok ug panghunahuna.