Amahan masuko kun pangayoan og sustento

Dear Atty. Divine,

Nagbuwag mi sa akong bana usa ka tuig na ang nakalabay. Usa ra ang among anak ug nia nako ang bata. Ang akong bana mosuporta sa bata apan dili kanunay, masuko pa gyud kun akong pangayoan. Gusto unta ko nga magpirmahanay mi og kasabutan aron dili siya makalimot paghatag sa iyang ayuda sa bata matag buwan, apan dili man siya mosugot. Unsay angayan nako nga buhaton attorney aron maseguro nga mohatag gyud ang akong bana matag buwan sa iyang ayuda? Asa ko modangop? Daghang salamat. — Mikee

Dear Mikee,

Ang una nimo nga buhaton mao ang pagpadala kaniya og demand letter pinaagi sa imong abogado. Kun dili gihapon siya mohatag, bisan kun gipadad-an na og suwat sa abogado, imong ireklamo sa barangay diin siya magpuyo aron siya ipatawag ug aron kamo magka-atubang ug magpirmahanay og kasabutan. Kun dili gihapon siya motunga sa barangay, ang sunod nimo nga buhaton mao ang pagpasaka kaniya og kaso, mahimo ka nga mo-file og criminal case base sa kalapasan sa Republic Act 9262, kon Anti-Violence Against Women and their Children Act, tungod kay ang pagdumili sa pagsuporta sa anak ug sa asawa, usa ka kalapasan sa balaod. Kun mapamatud-an siya nga sad-an sa maong kaso, mahimo siyang mabilanggo. Lain nimo nga option mao ang pag-file og civil case sa korte alang sa pagpangayo og suporta sa bata. Kun ang korte na ang modesisyon, mapugos gyud siya sa paghatag niini kay mahimo man siya nga i-contempt of court kun dili siya motuman sa maong kamandoan. Thanks and God Bless! -Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.