Kuwarta nga nausikan

Nagbarug karon ang tulo ka andana nga collapsible building diha sa Barangay Lorega niining dakbayan sa Sugbo. Proyekto kini sa Cebu City government sa kanhi Rama administrasyon nga gigastohan og dul-an sa P5 milyones, apan hangtod karon wala pa gihapon mapusli.

Ang naasoy’ng edipisyo gitumong aron kapuy-an sa mga batang libudsuroy nga ma-rescue dinhi sa dakbayan sa Sugbo, apan ni makausa ka higayon wala gyud kini magamit sa mga street children.

Ang rason kuno mao ang pagsupak sa mga opisyal sa barangay tungod lagi kay wala man sila konsultaha sa pagtukod sa naasoy nga proyekto kaniadto.

Ang edipisyo gitukod sa atubangang bahin sa Gawad Kalinga community nga gilangkoban sa 60 ka pamilya kinsa nabalaka nga kun pahilunaan og mga batang libudsuroy ang silingang building, basin og mainpluwensyahan ang ilang mga anak.

Samtang sa likud nga bahin sa collapsible building mao ang mga sikit-sikit nga barung-barong sa mga molupyo nga matud pa nila ang sukod sa ilang gipuy-an susama sa sukod sa usa ka nitso nga kanhi nahimutang sa luna nga ilang giokupahan karon diha sa Sitio Acacia.

Matag hangad sa mga molupyo sa tres andanas nga edipisyo, makapanghupaw sila nga unta sila ang nabulahan sa pundo sa kagamhanan kay sa gigamit kini sa proyekto nga walay kapuslanan.

Anaa na man nagbarug ang collapsible building, unta mapangitaan kini og pamaagi sa administrasyon ni Mayor Tomas Osmeña nga magamit kay sa pasagdan na lang nga kan-on sa taya ug hingpit nga maguba.

Laing pundo nga wala mapahimusli kaniadto mao ang P2.8 milyones sa DSWD nga gi-download ngadto sa DSWS alang mga street children. Giingong P800 mil lang ang nagamit gikan sa maong kantidad alang sa katuyoan.

Ang nabiling pundo gihan-ay na sa administrasyon ni Osmeña kun unsaon nga mapatuman alang gyud sa katuyoan niini. Sa sinsero ug seryoso nga pagserbisyo, kinahanglang walay pundo sa gobiyerno nga mausik ug walay mga tawo nga madehado.