EDITORYAL - Balanse nga panghunahuna

Nahukman ni Cebu City Mayor Tomas Osmeña nga si Konsehal Hanz Abella iyang himoon nga deputy mayor for education. Masaligon kaayo ang mayor nga si Konsehal Abella takus sa maong katungdanan.

Wala masayop si Osmeña paghatag sa maong katungdanan ngadto kang Konsehal Abella kay sinati kaayo niya ang edukasyon sanglit vice president man si Abella sa usa ka unibersidad dinhi sa dakbayan.

Apan ang nakapaiknat sa kilay sa katawhan dili ang paghatag og katungdanan ni Osmeña ngadto kang Abella, kun dili, ang tilimad-on nga si Abella anam-anam nga nasuod sa Bando Osmeña Pundok-Kauswagan.

Si Abella, kaalyado sa Team Rama nga gipangulohan ni kanhi mayor Michael Rama, mao nga miiknat ang kilay sa katawhan. Ang uban hinoon nga mga kauban ni Abella sa konseho wala na kaayo masurpresa pa.

Taud-taud na nga si Abella wala na magtambongan sa caucus sa mga konsehal nga alyado sa Team Rama nga nakapaturok og pagduda sa iyang mga kauban nga mura’g talibuwag na kini sa ilang grupo.

Hinuon, bisan og moipon pa sa BOPK sila si Abella ug Konsehal Dave Tumulak nga una nang mibuwag sa ilang grupo, dili pa gihapon malupig ang gidaghanon sa Team Rama diha sa konseho.

Unom ra ka konsehal ang midaog sa BOPK ug bisan pa’g pun-an kini nila ni Abella ug Tumulak, lupig gihapon sila kay napulo pa man ang Team Rama diha sa konseho, apil na ni Vice Mayor Edgardo Labella.

Sila si Konsehal James Cuenco ug Konsehal Jerry Guardo nga gituohan sa uban nga posible usab nga molukso sa BOPK, mipadayag na nga dili sila mobiya sa Team Rama tungod sa kaikog ug prinsipyo.

Hinuon, kun adunay mga pagtuki sa isyu nga magkinahanglan og pagbotar sa mga konsehal, unta gamiton nila ang ilang mga utok aron uyonan kini basta para lang sa kaayohan sa kadaghanan bisan kinsa pa ang naghimo sa sugyot.