Mr. Barangay
Brgy Cambaro, Mandaue City
“Unsa man tawon ning tigkuha sa basura diri sa among barangay nga halos dili man motabang pag-alsa sa basura inigkarga sa truck. Pero ngano nga kun gikan sa apartment ang mga basura mangunay lagi sila’g karga? Naa ni pinalabi o naa sila’y madawat kada kuha nila sa basura?”
Brgy Bato, Samboan, Cebu
“Naa lang ko ireklamo nga mga habalhabal driver kay ang ilang motor saba man kaayo’g tambutso. Halos dili mi makatulog labi na kun mobiyahi sila’g gabii.”
Brgy Mabolo, Cebu City
“Magpasalamat mi kay naaksyonan gyud ang among reklamo bahin sa mga bata nga sige’g hingos og rugby diha sa taytayan atubangan nga bahin sa Mabolo National High School.”
Brgy Ilihan, Tabogon, Cebu
“Ang mga nagtrabaho diri sa among barangay kay wa’y mga kasing-kasing, labi na sa mga BHW, kay kun naay kaayuhan nga moabot diri halos dili man kaabot sa mga beneficiaries kay sila may mag-una-una pagkuha hangtod nga ang tinuod nga hataganan wa gyuy madawat.”
Brgy Tunghaan, Minglanilla, Cebu
“Reklamo lang mi diri sa Sitio Ingga-Uyok kay grabe kakusog sa sugal kay magsugod og Biyernes ug usahay mahuman inigka Lunes na. Naay ubang bata dili na kaeskuwela kay wa maatiman sa ginikanan kay naa ra sa sugalan.”
Brgy Taloot, Argao, Cebu
“Diri dapit sa Sitio Liki kay naa mi silingan nga gisirad-an man ang agianan, maglisod intawon mi’g agi, labi na sa mga bata nga moeskuwela. Dugay na man unta ni namong agianan pero ngano nga karon gisirad-an na man?”
Brgy Luyang, Carmen, Cebu
“Daghanang badlungon diri sa among lugar uy, sama niining ubang driver nga mahal kaayo’g pangayo sa pletehan ug tuyoon gyud paghatag nga kuwang ang sukli unya naa say sugal diri nga swertres wala gyud mahunong kay naay protektor nga polis.”
Brgy Cansojong, Talisay City
”Naa lang koy reklamo diri sa Ebakan kay may gibutang diri nga mga video karera ug ang mga bata ang kanunay magduwa, ang uban dili na moeskwela. Wala man gyud ni sakmita sa mga polis nga unta klaro man kaayo ni.”
Brgy Marigondon, Lapu-Lapu City
”Diri sa crossing dapit, naay lumber diri nga ang ilang delivery truck nakababag na gyud sa agianan ug maoy hinungdan nga matrapik diring dapita. Maayo unta og aksyonan ni sa CTMS.”
Brgy Legaspi, Alegria, Cebu
“Butangan unta og steet lights ning among lugar kay ngitngit man kaayo labi na ning karsada padung sa Sitio Tumandok. Daghan na kaayo ang nadisgrasya diring lugara kay puwerte gyung ngitngita.”
Brgy Bulacao, Cebu City
“Diri sa amo kay naay nakahasol diri nga contractor kay ilang mga wires anaa gapasad lang sa karsada disturbo kaayo sa mga sakyanan ug sa mga tawo nga nagtrabaho kay maoy hinungdan sa trapik kada adlaw.”
* * *
Alang sa mga reklamo text lang sa 09326425494
- Latest
