EDITORYAL - Barangay election ipadayon gyud

Dili ikalimod nga daghang opisyal sa kabarangayan, sama sa kapitan ug mga konsehal, nga wala gyuy maayong serbisyo sa tagsa-tagsa nila ka lugar ug angayan na nga sila hulipan sa katungdanan.

Apan kun matuman ang tinguha sa ubang opisyal sa kagamhanan, apil na ni Presidente Rodrigo Duterte, nga iuktaba ang eleksyon sa barangay nga gitakda na karong Oktubre 31, mobahakhak sa kalipay ang maong mga ligoy nga opisyal.

Natural gyud nga ang mga kongresista dili ganahan nga mahinayon ang eleksyon karong Oktubre kay nagkahulogan kini og dako kaayong gasto alang kanila kay ang mga kapitan mangayo man kanila og financial support.

Kining maong mga kongresista nangiliyupo kaniadto sa mga opisyal sa kabarangayan nga sila suportahan aron modaog, ug karon higayon na usab sa mga kongresista ang pagbawos sa nakatabang kanila atol sa eleksyon kaniadtong Mayo 9.

Hinoon, bisan pa og adunay eleksyon sa barangay apan magpahaylo ra gihapon sa kuwarta ang mga botante, dili gihapon sila makapili og maayong mga opisyal.

Angay’ng putlon na sa mga botante ang ilang batasan nga botohan nila ang usa ka kandidato tungod kay ila kining suod, nga kauban nila sa pagpahigayon og tigbakay, bisan og dili maayong moserbisyo.

Daghang opisyal sa barangay nga dili gani makaatiman bisan sa pagpailis na lang unta sa mga pundir nga bombilya sa suga sa tagsa-tagsa nila ka dapit.

Unta, lamdagan ang huna-huna nila ni Presidente Duterte ug kaubanang mga opisyal sa kagamhanan, ilabi na sa mga kongresista nga dili nila iuswag ang pagpahigayon sa eleksyon.

Dili na angay’ng lugwayan pa ang termino niining mga opisyal nga ligoy. Walay angay’ng kabalak-an ang mga maayong opisyal kay kun may eleksyon, sigurado man nga sila pilion gihapon sa katawhan.