Unsay silot?

Wala nagpa-apekto ang administrasyong Duterte sa pagpatuman sa hugot nga kampanya batok sa illegal nga drugas taliwa sa nagpadayong senate inquiry batok sa extra-judicial killings sa mga suspetsadong durugista.

Samtang nangulipas ang kapolisan sa gipasangil nga extra-judicial killings nitumaw ang bag-ong anggulo nga mga durugista ra nga nagkasungi ang nag-unay sa pagpinatyanay tungod sa kompetensya.

Usa sa mga ehemplo ini mao ang nahitabong pinusilay sa barangay Pasil sa dakbayan sa Sugbo. Giangkon sa nakapatay nga si Rodel Udto nga iyang kakompetensya ang iyang napatay nga si Rogelio Gabasa sa negosyo sa drugas sa barangay Pasil.

Gikompirmar usab sa pipila ka tinubdan nga nakahibaw sa duwa sa illegal nga drugas nga mag-unay sa pagpinatyanay ang ubang durugista tungod sa kompetinsya.

Apan ang makapasubo nga kamatuoran mahitungod sa negosyo sa drugas ug sa bisan unsang illegal nga mga kalihukan mao ang pagbaha sa kuwarta nga andam ipanghatag ngadto sa kapolisan aron protektahan ang ilang illegal nga negosyo.

Usa ka kasaligang tinubdan nitug-an, estilo sa mga durugista ug bisan sa illegal nga sugal ang paghatag og kuwarta ngadto sa mga police station aron dili sila dakpon.

Anaa ra sa mga Chief of Police sa kada police station dawaton ba nila o dili ang kuwarta. Kun dili modawat ang COP iyang ginsakpan ang magbahin-bahin ini.

Obligasyon na sa COP unsay buhaton sa iyang mga ginsakpan nga modawat  sa kuwarta. Kun tarong ang hepe iyang ipa-relieve iyang sakop nga nidawat sa kuwarta.  Apan dili tanang polis nga giparelibohan sa ilang mga polis station nagpasabot nga nidawat sa drug money o gambling money.

Dunay pipila ka polis nga tarong nga girelibohan sa ilang mga polis station tungod kay agresibo ug wala modawat sa kuwarta.  Giingon nga ang kuwarta nga ihatud sa police station dili na mauli ngadto sa naghatag nga drug lord o sa gambling lord.

Busa, kun nakahibaw ka nga dunay kuwartang niabot sa inyong police station duha ray imong kapilian, modawat o relibohan ka sa pwesto. Kun modawat ang usa ka polis, ang sunod nga pagpanghatag adto na mahitabo sa panimalay sa drug lord.

Adto na kolektahon ang protection money. Apan isuwat ilang mga ngalan sa blue book ug ang uban mopirma pa sa mga drug lord o gambling lord nga nakakobra ka na. Sa mga lehitimong ronda sa tarong nga mga polis mahibaw-an kun makuha ang blue book ang mga pangalan sa mga polis nga nagdawatan sa kuwarta.

Dili man tanan, apan ikatingala na og dako sa mga tarong nga polis ug nangaraan na sa pwesto,  ngano nga ang usa ka PO1 pa lang luho na kaayo og mga butang nga huptan?

Apan ambot unsa ka lig-on kining maong matang sa mga ebidensya sama sa kaluho sa butang, kalit  nga pagkakuwartahan ug ang giingong blue book sa mga drug lords ug gambling lords nga mobarog isip ebidensya kun pasakaan og kaso ang mga polis nga gilambigit sa drugas ug sugal?

Pipila sa mga polis nakapangutana, nganong ang mga ultimo ra og ranggo  nga nagpositibo sa paggamit sa drugas gipasakaan og kaso samtang ang ilang mga opisyal nga gilambigit isip mga protektor igo ra man nga girelibohan ug gilabay sa lagyo nga mga assignment?  Kasigurohan ba nga magbinot-an na sila sa ilang panerbisyo karong gilabay  sila sa lagyong lugar?