Liba-liba sa SRP

Gihulagway sa Bureau of Fisheries and Aquatic Resources (BFAR)7 nga migara karon ang mga mangingisda nga migamit og liba-liba sa ilang pagpanagat dapit sa kadagatan sa South Road Properties (SRP).

Ang liba-liba mao ang pukot nga gagmay og mata nga gigamit sa pagpanakop og mga isda nga higpit nga gidili sa balaod sanglit apil sa nakuha ang mga gagmay nga isda. Nagsugod ang paggara sa mga mananagat sa ilegal nga pagkuha sa mga isda human giwagtang ni Mayor Tomas Osmeña ang Bantay Dagat Commission nga nakapwesto diha sa South Road Properties.  Naproblema ang BFAR sanglit wala man silay makontak nga departamento sa local government unit sa dakbayan sa Sugbo mahitungod sa naasoy nga problema.   Mahinungdanon kaayo ang papel sa matag LGUs sa pagprotehir sa kadagatan nga ilang nasakopan ilabi na sa pagpangunay sa pagbantay, pagsikop sa mga malapason ug pagpahamtang og silot pinaagi sa local ordinance nga napanday batok sa illegal fishing.  Kasamtangan ang mga kawani sa BFAR7 ang nag-oversee sa kalihokan sa mga mananagat sa SRP apan limitado sanglit dili lang ang Cebu City ang ilang gibantayan kun dili tibuok Central Visayas man.

Gipadayag ni kanhi konsehal Nida Cabrera, consultant to the mayor nga aduna nay go signal ni Osmeña ang pag-umol og balik sa Bantay Dagat ug mao kini ang ilang gihan-ay karon.  Wala hinuon siya mobutyag kinsa ang mga pangalan nga gipilian nga maoy mangulo sa Bantay Dagat. Samtang gitug-an ni Cabrera nga mohimo siya og rekomendasyon sa konseho nga amendahon ang existing local ordinance sa illegal fishing diin sagopon ang mga probisyon sa nasudnong balaud alang sa mas bug-at nga silot ug multa alang sa mga malapason.

Kini nunot sa awhag sa BFAR ngadto sa tanang mga local government units alang sa mas epektibo nga kampanya batok sa illegal fishing activity.  Dili lang kutob sa pagpanday og balaud kun dili sa pagpadulot gyud sa ngipon niini. Naa na bay nakonbikto sa illegal fishing dinhi sa rehiyon o partikular sa Sugbo?

Mag-unsa man ang balaod kun kutob lang kini sa papel. Kun unsa ka hugot ang kampanya sa gobiyerno batok sa illegal drugs ingon usab unta niini ka hugot ang ilang pagtutok sa tanan illegal activity sama sa pag-abuso sa kadagatan.