EDITORYAL - Balimbing ba sila?

Dinhi lang sa Pilipinas makita ang sistema nga magpanon gyud og pamalhin sa nakadaog nga partido ang mga sakop sa mga nangapilding partido. Gani wala na kini ikahibulong pa matag mahuman ang eleksyon kay nahimo naman kining kinaiya sa mga politiko.

Niadtong Sabado sa gabii, 300 ka mga lokal nga mga opisyales dinhi sa Kabisay-an nga dili sakop sa PDP-Laban ni Pres. Duterte ang nanumpa nga magpasakop sa maong partido.

Alang sa mga ordinaryong tawo salawayon kini nga kinaiya sa mga lider tungod kay daw nagluib sila sa grupo diin sila nagagikan.  Sa laktod pagkaestorya ang tawag kanila mga 'balimbing.'

Mahimong husto apan mahimo sad nga sayop ilang pagsaway. Kay adunay ubang politiko nga namahala na lang bisan unsa pay ikasulti sa uban kay para kini sa kaayohan sa mga tawo nga ilang gialagaran.

Nagsugod man kining sistemaha sa nasudnong kagamhanan. Kay adunay mga madinumtanong mga presidente kaniadto nga migamit sa ilang gahom aron manimalos sa ilang mga napilding  kontra partido bisan og nahuman na ang piniliay.

Ang makaluluoy mao ang mga kaalyadong local officials sa mga naparot nga presidente kay di man intawon sila gahinan og hustong pundo o hatagan og mga proyekto sa nasudnong kagamhanan.

Dili baya tanang siyudad o munisipyo sa Pilipinas malambuon ug adunahan. Mas daghan ang mga lugar nga nagsalig sa pundo gikan sa nasudnong kagamhanan aron mapalambo ang ilang mga imprastraktura sama sa pagpatukod og mga karsada, taytayan, hospital, irigasyon ug uban pa.

Ug usa sa solusyon nga ilang nahunahunaan mao ang pagtapon ngadto sa partido sa naglingkod nga pangulo sa nasud sa pagtuong paminawon sila sa ilang mga yangungo o pabor nga pangayuon, personal man o alang sa ilang lungsod.