Pagka-independent

Nakugang, nakalitan ug siguro nahiubos ang pipila ka sakop sa Team Rama sa kalit nga desisyon ni Konsehal Dave Tumulak sa pagbiya sa partido ug nibarug nga mag-independent sa iyang pagkasakop sa konseho sa dakbayan sa Sugbo. 

Ang rason ni Tumulak mao nga nasubrahan na ang pamolitika sa konseho maong mobuwag siya sa Team Rama. Iyang gitataw, bugtong niyang tinguha mao ang tinud-anay nga pagserbisyo sa mga Sugbuanon.

Kun mosulod na gani ang pamolitika diha sa panerbisyo, duha ra gyuy atong kapaingnan. Kun dili man mabuhong ang mga molupyo sa serbisyo, daghan ang mahikaw kanila nga mga benepisyo ug tarung nga serbisyo. Usa sa mga ehemplo niini mao ang pagtuman sa batakan nga mga serbisyo, ilabi na sa kabarangayan. Kun dili supporter sa mayor ang barangay kapitan, makaluluoy ang mga molupyo tungod kay dili sila mahatagan sa husto nga serbisyo.

Sama pananglit sa paghakot sa basura. Daghang molupyo magpakitabang nga makolekta ang ilang basura nga tagsa ka semanang napundo sa ilang tugkaran, nanimaho ug giutingkay na sa iro ug iring, ug sa mga mamasurahay. Samtang sa ilang tungod nga nailhang supporter sa barangay kapitan o sa mayor, hapit kada adlaw nga kolektahon sa mga basurero. Kun supporter ka sa kasamtangang administrasyon buhong ang imong barangay sa daghang proyekto.

Mao ni ang nakapabakikaw sa atong sitwasyon. Samtang napili ang maong mga opisyal aron sa pagserbisyo sa tanan nga walay pagpinig sa bulok sa politika, mag-agad na hinoon kita sa ilang kabubut-on.

Kun wala na makasabot si Tumulak sa mga pamaagi sa Team Rama sigon sa iyang pamahayag, hinaot ilang masabtan nga dili ang mga molupyo nga ilang alagaran ang mag-agad kanila.

Gihatagan sila sa mandato nga makaserbisyo sa kadaghanan sa walay pagpinig. Makaamgo na unta sila sa kadako sa responsibilidad ug obligasyon nga gisangon sa katawhan kanila.

Apan ang subo nga kamatuoran sa kasamtangan natong sistema mao, nanghinobra ang pamolitika. Dili motunhay ang panerbisyo sa gobiyerno kun walay politika.

Ambot kun makasustiner ba si Tumulak sa iyang pagka-independent sa konseho sa dakbayan sa Sugbo kun wala siya’y igong suporta sa bisan unsang partido.

 Hinoon, sa dagan sa politika ilabi na sa dakbayan sa Sugbo, layo ra ang duha ka semana ni Tumulak. Sunod natong madunggan sakop na siya sa Bando Osmeña Pundok Kauswagan (BOPK).

Human nideklarar si Tumulak sa iyang independence gikan sa Team Rama, nitanyag dayon si Mayor Tomas Osmeña og posisyon ni Tumulak sa iyang administrasyon. Ang pagka deputy mayor on police matters. Bisan kun wala pay kunpirmasyon sa tanyag ug pagdawat, si Tumulak dili na estranyo sa BOPK. Kanhi siya sakop sa BOPK sa wala pa ang Team Rama, busa dili na kita matingala pa nga sunod natong mahibaw-an balik na siya sa BOPK.

Dili na usab kini bag-o sa atong sistema sa pamolitika dinhi sa nasud. Gani, kapin pa lang sa duha ka buwan sa paglingkod ni Presidente Rodrigo Duterte sa puwesto, daghan na sa mga incumbent nga mga mayor dinhi sa Sugbo nga mga sakop sa Liberal Party, karon mobali na ngadto sa PDP Laban nga partido sa presidente.  Sama sa pamahayag ni kanhi mayor Mike Rama "politics is a game of the unexpected." Ato na lang panghinaoton nga dili nila makalimtan nga kitang katawhan nagpaabot sa tinarong nilang panerbisyo.