Trabaho lang

Nagdako na ang sumpaki tali ni Presidente Rodrigo Duterte ug Senadora Leila de Lima gumikan niining lakang sa senadora pag-imbestigar sa mga   extra-judicial killings nga giingong gikalambigitan sa kapolisan nunot niining kampanya batok sa ilegal nga druga.

Wala makaayon si Duterte sa lakang ni De Lima ug uban pang mga human rights advocates nga nagbatikos sa dugoong kampanya sa kagamhanan batok niadtong nalambigit sa druga ug uban pang krimen nga mikutlo na'g gatusan ka kinabuhi.

Karon, misangpot na sa personal ang buwelta sa presidente kang De Lima, kinsa aduna kunoy hinigugma nga iyang drayber kaniadto. Gani akusasyon ni Duterte nga mismo ang senadora maoy nalambigit sa druga sa panahon sa iyang pagka-secretary pa sa Department of Justice.

Hinuon gipadayon gayud sa Senado ang imbestigasyon niini  sa giingong mga extra-judicial killings sa otoridad. Ug nagkapuliki na'g panagang ang hepe sa Philippine National Police sa paggisa sa mga senador kaniya atol sa Senate inquiry.

Hinuon, alang kanako, insakto lamang ang pag-imbestigar sa Senado sa mga giingong extra-judicial killings sa nasud nunot niining gihingusgang kampanya batok sa negosyo sa ilegal nga druga. Angay lamang nga susihon kini kun aduna bay kalambigitan ang kapulisan.

Apan kinahanglan usab nga ang maong pakisusi dili mosangpot sa pagkondena na hinuon sa kapolisan nga maoy nagpaluyo sa maong mga extra-judicial killings. Kini tungod kay basin unya kun mosirko na hinuon ang momentum sa kapolisan sa ilang krusada batok sa druga.

Nagmadaugon na ang otoridad niining maong gubat. Ug dili kita makatugot pa nga motiurok na hinuon ang ilang kampanya tungod lamang sa mga tusik niini mga nagpakaaron ingnong mga human rights advocates nga kugi karon sa pagpangita og mga buslot.

Wala man siguroy problema ang mga pakisusi sa Senado, Commission on Human Rights ug uban pa. Nagbuhat lamang sila sa ilang trabaho. Apan trabaho lamang usab ang gibuhat sa kapolisan batok niining nagkagrabe nga problema sa druga. Ug angay usab kining sustinehan aron mapuhag gayud kining mga sagbot sa katilingban.