EDITORYAL - Kalma sa pag-drive

Nag-viral diha sa social media ang usa ka video nga nagpakita sa duha ka armadong tawo, ang usa niini nahibaw-an na nga polis, tungod kay gikulata niini ang drayber sa usa ka sakyanan nga gituohang nakahimo og sayop sa pagmaneho.

Kun magtan-aw ka lang sa video, makaingon ka gyud nga grabe kaabusado sa maong duha ka tawo nga parehong armado og mga pistola ug nagwara-wara sa ilang armas atubangan sa nagkurog nga drayber.

Wala matagbaw, giablihan sa polis ang pultahan sa mini cargo truck ug gibunlot ang drayber aron unta makagawas, apan wala gyud manaog ang drayber mao nga gisikad-sikaran na lang kini sa polis.

Si Mandaue City Police Office (MCPO) Director Roberto Alanas miparelibo na ni PO3 Renato Inot gikan sa Criminal Investigation Branch ug gibalhin sa Personnel Holding and Accounting Unit samtang mag-atubang og imbestigasyon. Wala pa mailhi ang kauban ni PO3 Inot.

Sigurado gyud nga si PO3 Inot moingon nga ang drayber maoy abusado ug samtang sila nagsakay og motorsiklo, diriyot sila maaksidente. Bisan pa og ingon niini ang sitwasyon, dili gihapon madawat nga ilang dagmalan ang drayber.

Isip mga polis, mahimo unta nga ila ra kining parahon ug kay dili man sila traffic police, manawag sila og traffic personnel nga makasakmit sa lisensiya sa drayber aron pamultahon base sa nahimong kasaypanan.

Dili na angay pa nga magwara-wara sila sa ilang armas kay ang drayber wala may gihimo nga makahatag og kakuyaw sa ilang kinabuhi. Sa ilang gihimo nga pagwara-wara sa ilang armas, sila na hinoon ang masaway sa nakakita.

Ang leksyon nga makuha sa mga motorista niining maong hitabo mao nga kinahanglan gyud ang courtesy, ang pagkamasinabtanon sa mga tawo nga magmaneho og sakyanan diha sa mga karsada.

Ang kabugnaw sa kaisipan samtang magmaneho’g sakyanan mas makapadali pa nimo pag-abot sa imong destinasyon.