EDITORYAL - Paukyab ni Duterte

Daw naibtan og tunok ang kadaghanan dihang gibakwi ni Presidente Rodrigo Duterte ang iyang pamahayag nga mogawas sa United Nations ang Pilipinas tungod sa pagpanghilabot niini sa internal problems sa nasud. Gawas lang sa Taiwan ug Kosovo nga adunay mga political issues sa ilang mga silingang nasud ug ang Vatican City sa Roma, mao lang ang mga nasud nga dili sakop sa UN. Bisan ang neutral nga nasud sa Switzerland niadtong 2004 nagpasakop na usab sa UN. Ang Pilipinas usa sa labing unang hut-ong sa mga nasud nga nahimong miyembro sa UN dihang kini nisulod niadtong Oktubre 1945 human sa Ikaduhang Kalibutanong Gubat. Unsa ka importante ang UN para sa Pilipinas? Isip miyembro sa UN, benepisyaryo ug may kaakohan kini sa seguridad, mga kasabotan, kooperasyon sa edukasyon, panglawas, ekonomiya, environment, siyensya, pundo, mga humanitarian aid ug daghan pang uban.

Labaw sa tanan, anaa kanunay ang UN panahon nga adunay mga sakop niini nga maigo sa katalagman, sama sa nahitabo niadtong bagyong Yolanda sa tuig 2013, ug ang Pilipinas numero unong benepisyaryo niini kay ikatulo kini sa kalibotan nga bantang kaayo sa kalamidad dala sa mga bagyo ug linog.

Kining tanan mawala kun mogawas sa grupo ang usa ka nasud. Bisan gani kadtong mga gibansagang ‘rogue states’ sama sa North Korea, bisan sa pagkabadlungon sa ilang presidente, nakapahimulos gihapon sa mga benepisyo nga naa sa ubang miyembro sa UN.  Husto pud hinuon si Duterte. Nganong manghilabot man ang UN sa kampanya sa iyang gobiyerno kontra-ilegal nga drugas nga aduna pa may ubang mga nasud nga diin mas kinahanglang mointerbiner ang UN?

Ang gibuhat sa UN igo lang nagpahinumdom sa mga kasabotan nga diin usa ang Pilipinas sa mga nilagda kabahin sa pagtahod sa tawhanong katungod sa tanan, kriminal o dili. Kinsa man guy tarong nga mobuwag sa UN kun mabaw ra kaayo ang rason? Kadtong gibuhat ni Duterte usa lang kadto sa mga naandan niyang paukyab dala sa emosyon.