Panagsabot sa kalinaw

Nagsugod na ang bag-ong panagsabot alang sa kalinaw tali sa kagamhanan ug sa mga rebeldeng komunista didto sa nasud sa Norway. Ug nakatutok karon ang tibuok nasud sa maong kalihokan, ilabina tungod kay ania na kita sa bag-ong administrasyon.

Daghan ang nagdahom alang sa malampuson nga bag-ong peace talks ilalum niining administrasyon ni Presidente Rodrigo Duterte. Kini aron makab-ot na ang dugay rang gipangandoy nga kalinaw sa nasud nga sa pipila ka dekada danlog kaayong makab-ot.

Ambot unsa ka dako ang tsansa nga makab-ot na sa katapusan ang kalinaw sa nasud. Hinuon, duol sa dughan sa mga rebelde si Duterte. Sa mayor pa siya sa dakbayan sa Davao, dali ra siyang makaduol kanila alang sa negosasyon.

Hinuon, lahi na ang senaryo karon. Tibuok puwersa ang kinahanglan nga atubangon sa presidente alang sa negosasyon sa kalinaw. Ug nga kinahanglan siyang moasdang sa pamunoan sa mga rebelde alang sa tinuoray nga panagsabot.

Atong nakita nga sinsero ang kagamhanan niining bag-ong negosasyon alang sa kalinaw. Gani usa kini sa mga prayoridad ni Duterte nga iyang gisaad panahon sa kampanya. Ug karon miarangkada na ang negotiating panel sa gobiyerno.

Apan unsa kaha ka sinsero ang mga rebelde niining bag-ong panagsabot alang sa kalinaw? Mao kini ang dakong pangutana karon nga ang maong grupo lamang ang makatubag. Kini tungod kay daghan nang negosasyon ang gipahigayon sukad pa kaniadto apan pulos nauli sa wala.

Morag anaa sa mga rebelde ang deperensiya. Kini gumikan lagi kay usahay maglisod sila pagsukli sa paningkamot sa kagamhanan alang sa kalinaw. Dili ba nga taliwala sa ceasefire nga gipatuman sa gobiyerno, padayon gihapon ang ilang mga opensiba?

Angay lamang usab nga sinsero ang mga rebelde sa paningkamot alang sa kalinaw. Gibuhat na sukad pa sa nangaging mga administrasyon ang mga lakang alang pagkab-ot sa kalinaw. Apan usahay adunay kalaki usab ang pikas grupo nga magpagoryogoryo.