Lakang nga walay sukaranan

Usa ka bata ang nanganti nga dili na magpasugo sa iyang ginikanan human gibawian sa iyang paborito nga mga dulaan. Apan inay sabton nga nakaluwat ra niadtong maong mga pulong ang bata tungod sa gibati nga kapungot, gisilotan na man hinoon kini pinaagi sa pagsalikway kaniya ug pagwagtang sa katungod isip miyembro sa pamilya.

Ingon niini ang nahitabo ni Mayor Tomas Osmeña sa kamot sa National Police Commission (Napolcom) nga mihukas kaniya sa iyang gahum pagsuperbisar sa kapolisan isip local chief executive.

Ang pagluwat og pamahayag sa mayor kaniadto nga dili na mosuporta sa programa sa kapolisan, ilabi na sa pagsumpo sa ilegal nga drugas, makapahugno gyud sa mga tawo nga taas kaayo og expectation sa gisugdan nga paggukod sa mayor sa mga durugista pinaagi sa reward system sa makapatay og mga kriminal. Apan dili igo ang pulong nga maoy basehan sa Napolcom sa pagsalikway kang Osmeña kay bunga lang kadto sa iyang kalagot. Angayan tan-awon nga walay gibawi nga city government resources si Osmeña gikan sa Cebu City Police Office, sama sa 42 ka patrol cars ug 64 ka motorsiklo ug uban pa.

Nagpadayon usab ang paghatag sa City Hall og cash incentive sa mga polis nga dugay na nga nagserbisyo sa siyudad. Hinoon kadtong mga bag-ong nadestino wala pa iapil sa paghatag sanglit wala pa man sila makapakita og labok.

Hinoon, ang P50 mil nga reward money ngadto sa kapolisan ngil-ad tan-awon kay mahulog nga mga nawong sila og kuwarta busa angayan lang nga giwagtang kadto ni Tomas. Nakita man kuno kini sa Napolcom atol sa ilang imbestigasyon apan ngano nga gisilotan man gihapon nila si Tomas? Gisuta gyud unta nila pag-ayo kun unsay gipasabot sa mayor sa iyang pamahayag ngadto sa media.

Ang pagpatim-aw ni Mayor Osmeña didto sa PRO-7 niadtong Lunes maayong sinyales nga magkauli na ang maayong kabubut-on sa kapolisan ug ni Tommy nga maoy gikinahanglan sa mga Sugboanon alang sa mas epektibong kampanya sa kriminalidad. Wala may sukaranan ang paghukas sa Napolcom sa gahum ni Tomas apan mas maayo nga ipadaplin na sa mayor ang pagkaluoran ug ipadayon ang suporta sa kapolisan tungod ug alang sa katawhan nga maoy mabulahan.