Ang krimen

Sa nagpadayon nga Senate Investigation nga gipangulohan ni Senador Leila De Lima mahitungod sa daghang patay nga nahitabo sa kampanya ni presidente Rodrigo Duterte batok sa gidiling drugas, gitandi ni Senador Allan Peter Cayetano ang krimen nga nahitabo atol sa administrasyon ni Presidente Noynoy Aquino ug Presidente Rodrigo Duterte.

Sa iyang power point presentation, gitandi ni Senador Cayetano ang gidaghanon sa mga patay nga nahitabo matag adlaw sa termino ni kanhi presidente Aquino ug karon sa administrasyon ni Presidente Rodrigo Duterte.

Sa iyang presentasyon gibutyag ni Cayetano nga sa panahon ni Noynoy adunay 15 ngadto sa 35 ka mga pagpamatay ang nahitabo matag adlaw lukop nasud, samtang ning panahon ni Digong aduna lay 10 ngadto sa 11 ka kaso sa patay matag adlaw.

Gidugang pa ni Cayetano nga sa panahon ni Noynoy ang gipangpatay mga inosente ug dili mga kriminal samtang karon sa gobiyerno ni Digong, mga nalambigit sa krimen ug misukol sa mga polis ang gipangpatay.

Sa pangutana ngano nga wala mopasiugda og imbestigasyon si Senador De Lima dihang siya pa ang Justice Secretary panahon ni Noynoy, labing seguro ang iyang tubag dili niya trabaho kaniadto ang paghimo og imbestigasyon.

Labing seguro, iya pa nga sumbalikon pagpangutana si Senador Cayetano kun ngano nga wala kini mopasiugda og imbestigasyon sa maong gidaghanon sa krimen nga nahitabo sa kagamhanang Aquino nga unta trabaho man kini sa Senado ug nga unta nasayod man siya nga aduna nay 15 ngadto sa 35 ka tawo ang gipangpatay matag adlaw lukop nasud diin ang mga biktima, inosenting sibilyan.

Unsa kaha ang ikatubag ni Cayetano kun pangutan-on siya niini ni De Lima?