House inquiry nga moduot ni Leila

Mohudas kaha ang drayber nga si Ronnie Palisoc Dayan sa iyang amo ug giingong “uyab” nga si Senador Leila de Lima?

Mitumaw kining maong pangutana human 11 ka kongresista nga gipanguluhan mismo ni House Speaker Pantaleon Alvarez mipasar og House Resolution No. 105 nga nanawagan sa pag-imbestigar sa tulobagon ni De Lima ug ubang opisyal sa Department of Justice ug sa Bureau of Corrections tungod sa paghimo sa New Bilibid Prison isip tapukanan sa mga higanteng drug lords ug makahimo og shabu laboratory sa sulod, apan adunay direktang transaksyon sa gawas sa prisohan.

Gawas ni Alvarez, mipirma sa resolusyon sila si Deputy Speakers Karlo Nograles ug Raneo Abu, Majority Leader Rodolfo Fariñas, Minority Leader Danilo Suarez ug mga Kongresista Michael John Duavit sa Rizal, Romeo Acop sa Antipolo, Jerry Treñas sa Iloilo, Abraham Tolentino sa Cavite, Salvador Leachon sa Oriental Mindoro, ug Eric Martinez sa Valenzuela. Mismo si De Lima padad-an og courtesy invitation aron mopatim-aw sa imbestigasyon. Gitan-aw nga apil sa imbitahon sila si Justice Undersecretary Francisco Baraan III, Bureau of Correction chief Ricardo Rainier Cruz III ug ang mipuli niya nga si Franklin Jesus Bucayu.

Ang kongresista sa Ifugao nga si Teddy Baguilat mikuwestiyon sa resolusyon. Sumala pa niya nga pamolitika lang kini tungod kay ang mga kongresista nga mipirma sa resolusyon susamang mga magbabalaod nga mibabag sa Senate inquiry sa extrajudicial killing sa nasud dungan niining pakiggubat ni Pres. Rodrigo Duterte batok sa ilegal nga drugas.

Para nako, angayan lang nga atbangan sa Ubos Balay Balaoranan ang Senate inquiry nga gipangulohan mismo ni De Lima.

Una, ang Senate inquiry klaro nga pagtabon lang sa gidak-on sa ka-guilty ni De Lima ning pagdaghan sa shabu sa nasud, tungod sa iyang pakigsuod sa mga drug lords sulod sa Bilibid.

Ikaduha, klaro nga pagduot kang Duterte ang iyang gihimong imbestigasyon, nga bisan daghan sa kauban niyang mga senador mikontradikta na sa iyang dinad-an, padayon gihapon niyang gimudmod ang administrasyon sa daghang patay nga nanghitabo sa nasud.

Mapugos ang drayber ni De Lima nga si Dayan pagtunga sa Kongreso. Ang pangutana, iduot ba kaha niya ang iyang amo ug giingong uyab-uyab?

Kun dili motunga, hayan ipadakop sa mga kongresista si Dayan. Itanggong kini hangtod mosulti.

Si De Lima imbitahan usab sa mga kongresista. Ang pangutana, motunga kaha si De Lima sa House inquiry?

* * *

Nasuko na si Duterte nga hangtod karon naghitak pa gihapon ang kurapsyon sa mga ahensiya sa kagamhanan. Partikular niyang gihisgotan ang LTO ug LTFRB. Aduna gyuy nakasulti sa presidente nga tag-as gihapon ang linya sa LTO, aduna gihapo’y mga fixer, ug sa LTFRB, nagpakabuta-bungol lang sa mga kolorum ug sa “one franchise in five vehicles” sa mga taxi o bus.

Nagtuo tingale sila nga mailad nila si Digong.