EDITORYAL - Kuwarta sa basura
Nindot ang resulta kun ipatuman sa kagamhanan ang proyekto nga bayloan og mga produkto, sama sa sardinas, ang mga basura nga ihatod sa mga tawo ngadto sa mga garbage collectors.
Ang resulta niini ang mga tawo dili na molabay sa mga basura diha sa karsada mentras dili pa moabot ang mga garbage truck aron nga makakuha sila og sardinas.
Dili sama karon nga ang mga tawo molabay sa ilang mga basura diha sa karsada bisan og wala pa moabot ang garbage truck, unya kay-agon sa mga iro ang basura, mao nga magkatag ug hugaw ang atong palibot.
Kinahanglan hinuon nga magmatngon si Mayor Tomas Osmeña sa pagmugna og mga sumbanan niining nahuna-hunaan niyang proyekto tungod kay basin og pahimuslan kini sa mga mapahimuslanon.
Kay dili man managsama ang gidaghanon sa mga basura nga ilabay sa mga tawo ngadto sa garbage truck, sa ato pa dili usab managsama ang gidaghanon sa sardinas nga ihatag kanila.
Dili imposible nga adunay mga mapahimuslanong kawani sa City Hall nga tugyanan sa pagpatuman niining maong proyekto nga magsanuoy unya pagpas-an sa delatang sardinas paingon sa ilang balay.
Kun sugdan na kining maong proyekto sa pagpatuman ni Mayor Osmeña, sigurado nga panagsa ka na lang makakita og magliundok nga basura daplin sa karsada.
Ang sagad nga makita unya mao nga ang mga tawo mag-ambahan na pagsugat sa mga garbage truck samtang magbitbit sa ilang sinako nga basura aron pabayloan og sardinas ug ubang delatang pagkaon.
Ang uban nga walay mga trabaho maikag pa nga manilhig sa publikong mga dapit aron nga makatigum sila og mga basura nga mapailisan nila og sardinas.
- Latest