Ang milyones ni Diaz

Makadawat og P5 milyones gikan sa nasudnong kagamhanan ang silver medalist sa Rio Olympics nga si Hidilyn Diaz.

Gawas niini, may lain pa siyang madawat nga cash gikan sa Senado ug personal gikan kang Senador Manny Pacquiao ug uban pa.

Sa ato pa mamilyonaryo si Diaz tungod sa iyang pagsalmot sa Olympics. Apan madawat kaha dayon ni Diaz ang iyang minilyon gikan sa nasudnong kagamhanan ug Senado?

Walay pangutana sa ihatag ni Pacquiao tungod kay dili man salapi gikan sa gobiyerno ang iyang ihatag.

Nakapangutana kun madawat ba kaha dayon ni Diaz ang iyang minilyon tungod kay hangtod karon, 20 na lang ka tuig ang nakalabay, ang laing silver medalist sa Atlanta Olympics didto sa America nga si Onyok Velasco wala pa gayud makadawat sa iyang P2.5 milyones nga gisaad kaniya sa nasudnong kagamhanan kaniadtong 1996.

Seguro si Onyok Velasco hangtod karon padayon pa nga nagpaabot nga ihatag na kaniya ang nahisgutang pahalipay ug naglaom nga wala kini makalimti sa mga hingtungdang ahensiya sa nasudnong kagamhanan.

Kun ugaling makadawat man si Hidilyn Diaz sa iyang P5 milyones gikan sa nasudnong kagamhanan ug lain pa nga kantidad sa Senado ug  kang Pacquiao, unta dili pud nila kalimtan ang P2.5 milyones nga dawatonon ni Onyok Velasco.

Mas maayo gani unta nga unahon nila ang kang Onyok kay 20 ka tuig na siyang nagpaabot niini nga moabot.