EDITORYAL - 14th month pay

Angay’ng suportahan sa tanan ang balaudnon nga gipasaka ni Senador Vicente Sotto III, nga kun maaprobahan, ang tanang kawani sa pribadong sektor makadawat na og 14th Month Pay kada tuig.

Ang 14th Month Pay katumbas kini sa usa ka buwan nga suweldo sa kawani. Sagad sa mga kompaniya nga naghatag na og 14th Month Pay sa ilang mga empleyado, sa buwan sa Mayo o Hunyo nila kini ihatag.

Sa ato pa, ang usa ka empleyado kaduha na modawat og benepisyo gikan sa ilang mga agawon nga bali og tagsa ka buwan nga sweldohan. Ang una madawat sa Mayo o Hunyo, unya ang sunod adto sa Disyembre.

Gusto ni Konsehal Sisinio Andales nga suportahan unta sa Cebu City Council ang balaudnon ni Senador Sotto, apan nasagmuyo siya kay ang uban niyang mga kauban mihukom nga patun-an pa kini sa Committee on Labor diha sa Konseho.

Masabot nga ang ubang konsehal kuwang og pagbati ngadto sa mga empleyado kay bisan ang paghimo’g lakang nga pagsuporta lang sa balaudnon sa Senado, magpanuko sila kay basin unya og may mahiubos.

Tinuod, daghang agawon ang magbagutbot gyud kun maaprobahan kining maong balaudnon ug hingpit na nga ipatuman kay maibanan na man ang ilang ginansya. Ang uban sab dili makaabot paghatag sa maong dugang benepisyo.

Ang paghatag og dugang benepisyo sa mga kawani makapasamot sa ilang kadasig nga motrabaho pag-ayo kay maikog man sila nga dili bugtian ang kaayo kanila sa ilang mga agawon.

Posible sab nga ang kadaghanan sa mga kawani dili na maglinigoy kay mahadlok man nga taktakon sa ilang trabaho tungod kay dagko na sila og suweldo ug benepisyo.

Apan bisan og maaprobahan pa kining maong balaod, wala gihapon kini kapuslanan kun ang hingtungdang ahensya sa kagamhanan dili estrikto nga mopatuman.