Ang pagsaway nga makalipay

Bisa'g unsa kamaayo sa atong buhaton, dili gayud malikayan nga kita masawayan. Kay matud pa, ang tawo dili perpekto, sa ato pa, di sab ta kaseguro sa atong panghunahuna nga kita husto. Kalagmitan nga kini nasubraan o  kulangan dili tukma o dili angay  bisa'g asa ini di kita maka-ipsot sa pagsaway.

Tungod ini, mosaway gayud kita, kun sa atong opinion lahi sa uban o kaha may nakita kitang dili mao. Kay ang nagtukmod sa pagsaway niini, mao man ang paghawid sa kaugalingong baruganan, nga gibase sa mga kasinatian sa kinabuhi. Mao nga managlahi ang atong panan-aw sa gusto nato mahitabo.

Ang pagsaway maoy pagpahimatngon nga makaamgo sa unsay mahimong epekto, aron kini mahigmata nga repasohon o kahimoan og kausaban. Balaanon ang pagsaway, kay tungod sa gugma, dili ta buot masugamak ang gisaway nga mahimong salawayon sa mata sa katilingban, nga way laing gibuhat kundili ang pagkahimantayon sa kasaypanan.

Apan ato sab matngonan ang kaugalingon, nga sa pagsaway nato nila, dili matandog ilang garbo, nga dili ikasuko kay naulawan, hangtud dili na kahinultol sa angay buhaton. Isegurong matun-an ang diskarte sa pagsaway nga kini makalipay. Gikinahanglan nga mabatyagan sa gisaway ang matinud-anong katuyoan. Ipabati ang mensahe nga malukmay sa malumo nimong mga pulong.

Ang mahait nga pulong, makasamad sa dughan, makasakit sa balatian ug makamatay sa pagkatawo, nga mahunosan sa paglaum, nga ang bugtong mahibilin mao ang kasilag ug kaligutgot.

Apan ang mapainubsanon nga pulong sa pagsaway, bisa'g kini mapait, tam-is niya ning dawaton ang kamatuoran. Nga mapasalamaton sa pagsaway, kay nakapatul-id kini sa hiwi niyang mga nahimo.