Unsa ka sinsero ang mga rebelde?

Sa iyang State of the Nation Address sa niaging semana, mideklara si Presidente Rodrigo Duterte og usa ka ceasefire tali sa Armadong Kusog ug sa mga rebeldeng komunista. Gusto ni Duterte nga masugdan na sa daling panahon ang panagsabot alang sa kalinaw.

Apan pipila ka adlaw human sa iyang SONA, mihulga ang presidente nga iyang bakwion ang iyang deklarasyon sa ceasefire. Kini human sa gikatahong pagpangambus sa New People's Army didto sa Davao nga mipatay og usa ka sakop sa CAFGU. Gisapot si Duterte ug midemanda og eksplinasyon gikan sa mga komunista. Kay kun padayon kuno ang sige nga opensiba sa New People's Army, mas maayo pa kuno nga padayon na lamang ang operasyon sa militar batok sa mga rebelde.

Rason sa liderato sa mga rebelde nga padayon kuno ang mga pag-okupar sa militar sa mga eskuwelahan sa mga kabarangayan sa mga probinsiya didto sa Mindanao. Dako kuno kini nga sagabal sa kahusay ug kalinaw sa maong mga lugar tungod sa mga pagpangabuso sa mga sundalo.

Hagbay ra akong nagduda sa sinsiridad sa mga rebeldeng komunista. Pipila na ka ceasefire ang gideklara sa nangaging mga administrasyon apan wala gihapon magsilbi tungod sa kalapasan sa maong grupo. Mao nang ning bag-o nga deklarasyon sa ceasefire, morag ang kagamhanan ra gihapon ang gitonto.

Ambot kun mosaler ba kaha kining paningkamot ni Presidente Duterte alang sa bag-ong peace talks uban sa mga rebeldeng komunista. Pipila na ka administrasyon ang nangagi apan miresulta gihapon sa wala kining maong mga negosasyon.

Hinuon suod sa mga rebelde si Duterte. Sa mayor pa kini sa dakbayan sa Davao, walay kahadlok kini nga mosaka sa bukid alang sa pagpakigtagbo sa mga komunista. Gani, daghan kini’g nabuhiang mga sundalo ug pulis nga bihag sa mga rebelde kaniadto. 

Apan morag wala mosaler ang iyang lana karon. Kini tungod kay wala mokubit ang mga rebeldeng komunista sa iyang ceasefire. Karon, alkanse na hinuon ang kagamhanan gumikan kay dili kabalos ang mga sundalo tungod lagi sa deklarasyon  sa presidente.

Hinaut nga modukol ang liderato sa mga rebeldeng komunista sa ilang mga sakop sa paghatag og respito sa deklarasyon sa presidente. Kay kun dili, nan dakong kwestiyon ang sinseridad sa mga rebelde alang sa gipangandoy nga kalinaw sa nasud.