EDITORYAL - Road rage vs disiplina

Nadakpan ra gyud sa kataposan kadtong usa ka Army reservist nga nalambigit sa road rage didto sa kaulohan human sa pipila ka adlaw nga pagtago-tago gikan sa balaod.

Sa sitwasyon karon sa trapiko sa mga dagkong siyudad sa nasud, way sakyanan nga dili gyud maabtan og katanggong tungod sa kadaghan na sa mga sakyanan apan wala madugangi ang dalan.

Dugangan pa og mga drayber nga way kabangkaagan sa traffic laws, disiplina ug road courtesy, susama gyud nga ang kadalanan bisan unsang orasa adunay moulbo nga kagubot sama sa nahitabo sa siklistang gipusil patay sa negosyante nga usa diay ka reservist. Daghan kaayong mga susama niining tawhana bisan dinhi sa Sugbo, abi kay nakamaneho og sakyanan, mura na og si kinsa kun mamalikas sa ubang drayber ug manulisok pa.

Ang nakaparat, sila usab kadtong adunay mga tinagoang armas nga mao ra usab ang ilang gisaligan kun sila suklan sa laing drayber. Kaluoy intawon sa mga ordinaryong motorista.

Dili lang kini maoy unang higayon nga nagkabingkil ang mga drayber nga misangpot sa krimen, hinuon dili man kini pirme o basin wala lang gyud mosangpot sa pinatyanay ang panagbingkil.

Apan bisan kining yanong dumbol-dumbol sa mga sakyanan resulta kini sa kawalay road courtesy sa ubang mga drayber, kanang paturagas lang pagbalhin og lane maoy numero unong hinungdan sa dumbol.

Gawas pa niana, aduna say ubang drayber nga mura og nakatag-iya og karsada tungod kay magpatuyang ra man og pakusog nga usahay moresulta sa mga aksidente ug niusik og daghang kinabuhi. Kun dili makapangita og pamaagi ang mga ahensya sa gobiyerno bahin niining kawalay disiplina sa ubang mga motorista, mas maayong ang mga drayber na lang maoy magsugod sa ilang kaugalingon og disiplina.

Ning paagiha, kun ang tanang drayber maniguro nga di makasala sa ubang motorista, wala gyuy mahitabong road rage o dinumbolay.