EDITORYAL - Seryoso ba ni sila?

Malisod nga tahas ni bisan kinsang presidente sa Pilipinas ang  pagkab-ot sa tinud-anay nga kalinaw ug paghunong na sa insurhensiya tungod kay nakagamot na og maayo ug nagkaanak na ang pagdumot ug kawalay pagsalig sa usa’g-usa.

Si Presidente Rodrigo Duterte sa makadaghang higayon na miingon “I love my country” ug “my job to bring peace” mao nga kutob sa iyang mahimo dili niya gustong adunay grupo sa mga separatista ug rebelde nga masilo. Apan niini lang bag-o, duha ka insidente nga gikalambigitan sa mga rebeldeng New People’s Army ug ang Moro Islamic Liberation Front ang gikaengkwentro sa kasundalohan didto sa Mindanao.

Adunay pagpangambus nga gihimo sa mga gidudahang sakop sa NPA didto sa Davao del Norte diin usa ka sakop sa CAFGU ang nakalas ug upat ang naangol, nahitabo kini duha ka adlaw human nideklarar og unilateral ceasefire si Duterte sa mga komunista ug nakapahiubos gyud kaniya.

Hinuon aduna nay gihimong mga lakang si National Democratic Front peace negotiator Luis Jalandoni aron paghimo og imbestigasyon bahin sa nahitabo. Sa habig usab sa mga rebeldeng Muslim nga karon usab nakigsabot-kalinaw sa gobiyerno sugod niadtong 2014, ang Moro Islamic Liberation Front nakahatag og laing labad sa ulo ni Duterte dihang adunay nahitabong engkuwentro  niadtong adlaw nga Miyerkules didto sa Maguindanao.

Ang militar mipasangil nga gibanabanang 100 ka sakop sa MILF gikan sa duha ka kampo sa maong mga rebelde ang nilaban ug ni-reinforce sa gigukod sa militar nga teroristang Bangsamoro Islamic Freedom Fighters (BIFF).

Base sa nanggawas nga report, giingong nilaban ang MILF kay kadugo sa mga kumander niini ang kumander sa BIFF nga napiit na sa opensiba sa militar. Ang BIFF way labot sa  GRP-MILF peacetalks.

Lisud gyud kini nga sitwasyon tungod kay tataw nga way kontrol ang mga liderato sa mga rebelde sa ilang mga sakop. Busa di gyud kamahayan si Duterte dihang siya mipadayag nga kun magpadayon og ingon niini mas maayo pang magbinakbakay na lang pagbalik inay nga magsabot alang sa kalinaw.