EDITORYAL - Ayaw kamo pagmahay

Daghan na karon ang gibati og kabalaka tungod sa sagunson nga pagpamatay sa mga gikatahapang drug pushers.

Halos kada adlaw, daghang tawo ang moligdas nga wala nay kinabuhi dinhi sa dakbayan sa Sugbo ug sa ubang bahin sa atong nasud, ug pipila sa mga biktima napatay sa giingong pinusilay sa mga polis.

Klaro kaayo nga adunay ubang mga tawo nga misakay na karon sa higayon pinaagi sa pagpatay sa ilang mga kontra ug ipatuo lang nga ang mga biktima gipatay kay nalambigit sa gidiling drugas.

Sama sa krimen nga nahitabo sa Mandaue nga ang usa ka tawo giingong gipatay tungod diay sa panagribal sa usa ka babaye, apan gipatuo nga ang biktima nalambigit sa drugas.       

Ang kapin sa sayes milyones ka botante sa nasud uyon niining paagi sa pagpahunong sa problema sa drugas pinaagi sa pagpatay sa mga nalambigit niini.

Wala malilong sa mga nibotar ni Presidente Rodrigo Duterte ang iyang panaad nga kun siya modaog, puohon niya ang problema sa drugas sulod lang sa tulo ngadto sa unom ka buwan.

Kadtong mga nibotar kang Duterte nasayod gyud nga didto sa Davao City nadungog na nga gipangpatay sa giingong mga sakop sa Davao Death Squad ang mga nalambigit sa ilegal nga drugas.

Kay nidaog man si Duterte sa pagka presidente nagpasabot nga gisuportahan sa katawhan ang iyang pamaagi pagsumpo sa gidiling drugas ug mao na kini ang nasinati karon sa nasud.

Daghan ang niingon nga dili angay’ng kawid-an ang mga tawo nga nalambigit sa drugas kun todason sila sa mga polis. Apan wala mahuna-hunai sa katawhan ang kapeligro kun abusohan sa kapolisan ug pamatyon ang ilang mga kontra, dayon pasanginlan lang nga drug pusher.