Makapahilak nga bahin sa SONA

May mga naminaw sa labing unang State of the Nation Address (SONA) ni Presidente Rodrigo Duterte nag-atang sa giingon ni Communications Secretary Martin Andanar nga bahin sa pakigpung nga nakapahilak niya.

Nabawo ang kasagaran nila. Nangangkon nga inay makahilak nakakatawa hinuon sila sa mas taas nga mga pakapin ni Duterte sa sinuwat niyang pakigpung.

Mao nga akong gisubli ang tibuok SONA pinaagi sa transcript sa aktuwal niyang mga gipanulti, naglakip sa dul-an sa oras nga adlibs ug wa maglakip sa mga bahin sa inandam nga 15 ka pahina nga diskurso nga wa niya basaha. Mangahas ko pag-agpas nga ang panapos nga bahin maoy nakapahilak sa iyang tigpamaba.

* * *

Sa di pa nako sublion ang emosyonal nga panak-op sa SONA ni Duterte, tuguti nga mangagpas una ko nganong klaro mang wa magkasabot ang presidente ug ang mga nag-andam sa iyang pakigpung:

* May mga sakop sa gabinete nga niinsistir nga isukip sa SONA ang ilang mga plano ug mga proyekto sa mosunod nga unom ka tuig;

* Hinikalimtan nga si Duterte di diay ganahan nga mobasa og kaliboan ug usa ka detalye nga di pamilyar niya kay di duol sa iyang kasingkasing; ug

* Nabantang human sa pipila ka gutlo nga pagbasa sa pasiunang mga pahina sa iyang SONA nga si Duterte di maayong paminawon nga magbasa, morang magtutudlo nga gipugos pagpahimo og inandam nang lecture.

* * *

 Bantogang direktor sa pelikula si Brillante Mendoza apan klarong way kasinatian sa pag-dokumento og live event sama sa SONA, labi na kun ang nagdiskurso gawas nga wa mosubay sa sinuwat nga script mas taas ang pakapin ug nagpatuyang pa gyod pagpanawag sa mga sakop sa gabinete maong naglisod pagpangita ang mga kamera.

Angay sang maleksiyon si Andanar nga di makiangayon alang ni Duterte ang iyang pagpanganti nang daan nga ang iyang SONA makapaalimbukad pagbalik sa atong gugma sa nasud ug labaw sa tanan makapatagak sa mga luha. Lisod ang pag-una-una sa bosing nga di madiktahan unsay buhaton.

* * *

Sa kataposan, ania ang makapatandog nga bahin sa SONA nga nisunod sa adlibs ug pagbatbat sa nagbuntaog nga mga suliran sa nasud:

“But we should not despair. Like someone wrote: It is when the night is darkest, that dawn breaks. We are imbued with resiliency that has been tested and proven by more difficult times in the past. We have a bond to act together. We have to help each other. For then and only then can we truly prevail.

 “And the Filipino, disciplined, informed, involved, shall rise from the rubbles of sorrow and pain. So that all the mirrors in the world will reflect the face of a passion that has changed this land. Daghang salamat.”  [email protected]