Dagat ang lutoanan og shabu

Dayong tapos sa una niya nga State of the Nation Address (SONA) niadtong Lunes, gipalili ‘tang Presidente Rodrigo Duterte sa iyang nahibaw-an nga kaseryoso sa problema sa ilegal nga drugas. Pipila sa kasayuran nahibaw-an na niyang daan samtang ang uban nakuha dihang nakabanos na sa Malakanyang. Matud ni Duterte giawhag siya sa Armed Forces of the Philippines (AFP) ug Philippine National Police (PNP) pagtago sa kasayuran.

Apan gipahibawo niyang katawhan aron pagpasabot sa iyang pag-apura ug paggamit og di kasarangang paagi sa pagbadlong sa mga durugista. Apan sama sa nangagi niyang expose, tungod ba kaha sa kaapiki sa panahon o ka-sensitibo sa kasayuran, nihit ang iyang detalye.

* * *

Gibutyag ni Duterte nga ang labing dagkong drug lords nga mga bilyonaryo wa dinhi sa Pilipinas. Wa niya sila ilha. Nagbase sa ubang kanasuran nga wa sab ilha. Matud niya ang mga nadakpan sa kapolisan dinhi sa ato mga batabata lang.

Gipasabot ni Duterte nga lisud tultulon ang mga pabrika kay ang pagpangluto sa shabu wa na himoa sa yuta. Ang higanteng mga lutoanan og shabu tua sa international waters, ang bahin sa kadagatan nga gawasnong lawigan sa mga barko sa nagkalainlaing kanasuran.

* * *

Matud ni Duterte gigamit sa mga sindikato sa ilegal nga drugas ang modernong mga teknolohiya. Gisud ang linuto nga shabu sa selyadong mga baril ug gipanglabay sa dagat. Ang matag baril may himan sa global positioning system (GPS) aron dali rang makit-an.

Nikumpisal si Duterte nga lisod ang pagsubay sa mga ruta sa ilegal nga drugas tungod sa direktang satellite sa mga sindikato. Imposibleng mahubad sa Pilipinas ang codes, triangulation ug ubang maniobra sa mga durugista.

* * *

Labihan kalisod sa pag-apas sa bag-ong mga teknolohiya sa mga sindikato nga nagkinahanglan ang Pilipinas og tabang sa mga nasud sa Asya, Amerika ug Uropa. Labihan kadinalian sa panginahanglan pagsulbad sa suliran nga kun di mabaraw karong tuiga mahimong malumos nang republika sa drugas.

Naglibog si Duterte unsaon pagbadlong ang problema pinaagi sa pagdakop sa dagkong durugista maong nakahukom nga mas maayong patyon na lang. Apan kinahanglan pa mang mananghid sa ubang kanasuran aron maihaw ang mga nakagusbat sa Pilipinas.

* * *

Matud ni Duterte labihan kadako sa problema sa ilegal nga drugas nga managana na siya paghimo og bisan unsang lakang. Imposible ang pagbadlong nilang tanan. Kun may matsambahan nga usa mas daghan ang makalusot. Maong mandoan niyang militar kun makita nila paulbuhon dayon.

Ang kaseryoso sa kasayuran ni Duterte gikabalak-an hinuon nga wa matugkad sa kasagaran sa mga naminaw sa SONA. Kay nisunod sa way kinutoban niyang adlibs ug pakatawa. Gikapoy na si Duterte human sa usa ka takna ug 32 ka gutlo nga pakigpung. Mas gikapoy sang mga naminaw niya.  [email protected].