Karaoke

Duna koy amigo nga nabalda pag-ayo sa kasaba sa karaoke. Matud niya, maayo unta kuno nga dunay ma-imbento nga matang sa karaoke nga dili mohasol sa mga silingan. Ingon siya nga kasagaran sa mga baligya karon nga karaoke alang man sa mga silingan.

Unta, matud niya, duna unta kunoy karaoke nga alang lang sa tag-iya niini, ug dili alang sa mga silingan.

Sugilon niya nga hapit matag Domingo hasulon siya sa kasaba sa karaoke. Nindot unta kuno ipahulay, ikatulog sa udto, apan, dili sila pakatulgon sa karaoke ug pugson pagpapaminaw sa full volume ug sinagitay nga mga awit nga kasagaran yabag.  Wa gyud tay mahimo ni, migo. Pagkadimalas sa akong amigo. Only in the Philippines kini. Sa ubang kanasuran supak kini sa ilang balaud.  Dinhi sa ato, mora man og gitugot kini sa atong mga balaud.

Sa akong bahin, wa kaayo ko mahasol niini, kay ang mga tag-iya sa karaoke, ang matang sa karaoke nga ilang napalit maikog man namong mga silingan. Busa, dili kaayo problema ang mga karaoke nga naglibot sa among dapit.

 * * *

Two party system. Sukad sa 1987 Cory Constitution, kanunay kitay dumalaon og minority president. Meaning, ang atong mga presidente, lakip si incumbent President Digong Duterte, wala pilia sa majority sa mga pumipili. 

Kini tungod sa kadaghan sa mga pilionon pagka-pangulo, dili makuha ang 50 plus one nga majority. Busa, kun mag-usab man kita sa atong Constitution, kay mag-Federal Philippines man kaha kita, kining multi-party system, maayong wagtangon, ug mobalik kita sa two-party system.

Ini’g sagop nato sa two-party system, did-an pud ang makauuwaw unta nga pagbalimbing. Sa America nga maoy sagad natong awaton, dili ug wala kita   makadungog nga ang usa ka Republican mobalitok pagka-Democrat, and vice versa kay mauwaw sila. 

Dinhi sa ato, usa kini ka dungganang buhat.  Ambot nganong nadungganan man ni?  Hinumdom ko, sa ato nang gihisgutan dinhi, mora man to og dunay anti-turncoatism bill - balaudon nga magdili pag-ilis-ilis og partido sama nga mag-ilis og medyas o kurbata.

Wa man tingali to ka first base. Normal kini sa atong nasud. Dili kini makauuwaw, in fact, usa kini ka necessity, a must.  Nagpasabot nga walay bili ang partido. Pang-convenience lang kini sa atong mga halangdon unta nga mga sulogoon sa lungsod.

Ang atong mga  partido walay ideology, walay baruganan, walay prinsipyo. Mao nga ang  atong pagbotar, mag-agad sa personalities sa mga kandidato, wala ang partido. It's time we go back to the two-party system.