EDITORYAL - Patas-anay og garbo

Gihulagway sa kadaghanan nga utokan ug daghan kaayo’g mga nindot nga ideya si Cebu City Mayor Tomas Osmeña nga makapalambo sa dakbayan sa Sugbo.

Apan napanglantawan nga maglisud si Osmeña pagpatuman niini tungod sa grabeng pamolitika, ilabi na nga karon nga nabentahaan ang iyang grupo sa gidaghanon sa mga alyado diha sa City Council.

Unom lang ka konsehal ang alyado sa Bando Osmeña Pundok-Kauswagan (BOPK) samtang 12 ang alyado sa Team Rama, apil na ni Vice Mayor Edgardo Labella. Daghan ang nangandoy nga unta magkahiusa na ang mga politiko dinhi sa dakbayan sa Sugbo alang sa kalamboan sa siyudad.

Apan gitan-aw sa uban nga ang mga politiko nga alyado sa duha ka politikanhong grupo padayon nga nagbingi ug klaro kaayo nga apektado ang kinabag-ang katawhan.

Mas nindot gyud unta nga ang mga politiko nga giilang mga haligi dinhi sa dakbayan, sila si Osmeña ug kanhi mayor Michael Rama mopadaplin sa tagsa-tagsa nila ka politikanhong interest alang sa kaayohan sa katawhan. Angay unta kadto nga human gyud sa eleksyon usa’g-usa kanila mopaubos sa ilang masi’g ka garbo ug maghiusa, mohunong na sa paghimo’g mga makapalagot nga mga kalihukan.

Apan ang pangutana kun kinsa kanilang duha ang mouna sa paghimo’g lakang aron silang duha magkauli nga pareho man silang duha nga tag-as og garbo?

Sigurado unta nga pagakpakan sila sa katawhan kun adunay usa kanila nga mohimo’g lakang aron maghiusa sila ug magtinabangay pagpalambo sa atong siyudad. Si Rama ug Osmeña pulos adunay mga lainlaing katakus ug mga hiyas nga gikinahanglan sa katawhan sa dakbayan aron nga mogiya niini ngadto sa kalamboan.

Apan ang pangutana kun unsaon ug kun kanus-a nga sila si Osmeña ug Rama magkahigala pagbalik, maoy usa ka pangutana nga matud pa sa uban, nagtangag og dakong tanghaga.