Kulbahinam sa SONA!

Nakatutok ang tanan sa labing unang State of the Nation Address (SONA) ni Presidente Rodrigo Duterte karong adlawa.

Excited ang tanan sa mga ipamatbat sa ika-16 nga pangulo sa Republika ng Pilipinas kinsa nabutang sa puwesto pinaagi sa landslide victory nga gihatag sa mga Filipino nga mibotar kaniya.

Gipaabot nang daan nga hisgotan sa presidente ang isyu sa Federalismo nga usa sa iyang gitinguha nga mapatuman.

Syempre apil usab ang krusada pagpuo sa hingpit sa kriminalidad ilabi na ang isyu sa illegal nga drugas ug ang pagpatuman sa silot kamatayon alang niadtong makahimo sa mga bug-at ug linoog nga krimen.

Apan kung kini lang nga mga isyu ang ipamulong ni Duterte sa iyang SONA mura man og magtan-aw kita og replay sa iyang gipangestorya sukad pa kaniadto nga wala pa siya mahimong presidente.

Hinuon bisan og murag replay apan lami man gihapon paminawon ilabi na niadtong mga tawo nga nakauyon sa mga patakaran nga gisugdan na sa pagpatuman sama sa pagpuhag na sa mga durugista.

Labaw sa tanan ang giatangan karon mao ang pagbutyag ni Digong sa mga opisyal sa local government units sama sa mga mayor nga giingon niyang tigpanalipod sa mga drug lords.

Human walay lipodlipod nga ginganlan sa presidente ang mga PNP generals nga mga drug protector, karon ang gikahinaman pag maayo sa mga tawo kun ang ilang mayor apil ba kaha sa mga nalambigit sa illegal drugs.

Aguy kagabii pa lang aduna nay wala makatulog ug gipangulbaan nga mga local chief executives tungod kay sila mismo ang nasayod na nga sila guilty. Hinuon dili man sila diretsohon sa pagbitay ni Digong kay hatagan pa sila og kahigayonan nga pamatud-an ang ilang pagkainosente.

Kun madayon man, mabisto na gyud ang pagpakaaron-ingnon sa inyong napili nga mayor nga usa diay ka durugista.