Lakbay Aral

Dako ang akong kalipay sa pagkadungog nako ni Presidente Rodrigo Duterte kaniadtong niaging semana nga nagmando sa pagpahunong na sa mga lakbay aral nga gipasiugdahan sa mga lokal nga kagamhanan sa tibuok nasud.

Samtang nindot unta paminawon ug sabton ang katuyoan sa lakbay aral, apan klaro kaayo nga giabusohan kini ilabi na sa mga politiko. Bisan gani ang mga batan-on kaniadto sa Sangguniang Kabataan sa wala pa usba ang balaod sa SK, nakakat-on usab sa junket nga maglaag nga gihimong opisyal pinaagi sa lakbay aral.

Sa pagkatinuod lang, sa pulong ug ideyalismo ra kutob ang lakbay aral. Apan kun maghisgot ka og kongkretong resulta sa ila kunohay nga nakat-onan wala gyud intawon.

Dili man gani makahatag og opisyal nga report isip feedback kun unsay ilang gihimo didto ug kun unsay ilang buhaton base sa ilang mga nakat-onan.

Pero ang mga estorya kun unsa kanindot ang botanical garden sa Singapore pananglitan, o ang Japan o kaha ang Netherlands pwerting daghana, nunot sa pagbaha sa Facebook sa ilang mga hulagway nga dagko kaayo og ngisi sa kalingaw sa ilang gihimo.

Dunay ubang mga LGU nga maglakbay aral kunohay sa Japan pananglitan aron kat-onan ang mga pamaagi sa hustong paghipos sa basura, o ba kaha muadto sa Ilocos Norte aron masayran kun giunsa  pagpalambo ang windmill power isip usa sa mga matang sa renewable energy.

Apan kataw-anan tungod kay ang nagka-interes wala sa kapasidad nga mopatuman niini kun tinud-anay gyud sila nga mosagop sa maong matang sa teknolehiya sanglit ang ilang lugar dili haum para niini.

Ambot kun si kinsay ilang gusto nga hatagan sa katagbawan ug kaalam, o lulinghayaw ra gyud ang ilang gusto sa mga lakbay aral nga gipasiugdahan.

Atol sa campaign period niadtong eleksyon sa Mayo, pwerting daghana sa mga lakbay aral nga gipahigayon sa mga mayor. Take note, dili ordinaryong lakbay aral ngadto sa mga probinsya sa Pilipinas ang ilang gihimo, tungod kay sa gawas sa nasud sila nanglaag.

Dunay usa ka lungsod sa amihanang Sugbo nga ang mga barangay kapitan ug mga konsehal sa lungsod ang gipauban sa lakbay aral kuno ngadto sa usa ka tourist destination sa Singapore.

May nakahunghong nako nga sa tinud-anay pangdismolar lang ang lakbay aral. Mao kuno to ang pamaagi sa mayor sa iyang pagpangulitawo sa mga barangay kapitan nga suportahan ang iyang kandidatura sa eleksyon.

Apan kadtong mga alipores sa mayor nga nanguban kinsa may nibayad para nila? Maayo pa sila kay nakabiyahe na sa ubang kanasuran gamit ang kuwarta sa mga magbubuhis. Sayon ra kaayo pagwaldas ang kuwarta sa mga magbubuhis ngadto sa mga walay hinungdan nga mga programa ug kalihukan nga pipila ray  makapahimulos sa personal pa nga  katagbawan sa ngalan kunohay sa serbisyo publiko.

Karong nimando na ang presidente sa pagpaundang sa mga lakbay aral, hinaot nga mopadulong na sa tarong nga mga katuyoan ang buhis namong mga Juan dela Cruz.