EDITORYAL - Kanser sa katilingban

Nagkaanam og kagamay ug kahagip-ot ang kalibutan sa mga drug pushers ug kadtong mga mid-level drug dealers dinhi sa Pilipinas kun tan-awon ang nagkataas nga talaan sa mga napatay kanila, ug maayo nga sugdan na dayon kining ‘pagtambal’ sa kanser karon sa nasud -- ang problema sa ilegal nga drugas.

Apan maihap pa lang sa mga tudlo ang napatay nga mga bigtime drug lords samtang adunay uban nga posibleng nakasibat na, ilabi na kadtong mga Chinese drug lords ug mga Filipino usab nga wala hinganli ni Presidente Rodrigo Duterte duha ka semana na ang nakalabay.

Samtang nagdagan ang panahon, nagkapupos usab ang tulo hangtod unom ka bulan nga tagal nga gisaad ni Duterte paglimpyo sa nasud gikan sa krimen ug sa mga drug lords. Basin kuwangon sa panahon ug dili hingpit nga mabuntog ang maong sakit.

Angay sigurong awhagon pa ang gobiyerno nga paspasan pa gyud kining ilang kampanya tungod kay hangtod nga dili mapuo kining tanang drug lords, magpabilin silang hulga sa kahapsay ug kalinaw sa nasud ilabi na sa kaugmaon sa kabataan.

Gawas sa mga drug lords, kinahanglang isunod usab og hipos kining mga anaa sa gobiyerno nga nahimong protektor niining mga sindikato.

Kining problema sa drugas nakagamot og maayo tungod kanila gumikan sa kuwarta nga ilang sinemana o binuwan nga madawat isip drug protection money sa mga hiwi nga anaa sa gobiyerno.

Susama kini sa sakit nga kanser nga ang kagaw lamunon ang mga himsog nga parte sa lawas hangtod nga kini matakdan na lang ug nahimo na nga problema sa tibuok lawas nga sa kadugayan ikamatay na niini.

Dili pa siguro uwahi ang tanan kay aduna pay daghan nga masalbar ug malikay gikan niini nga kagaw ug mas mahimo kining epektibo kun mismo kining mga small time drug pushers, drug dealers ug bisan kining mga drug users motabang pinaagi sa pagsumbong sa mga tawong nalambigit sa ilegal nga drugas diha sa ilang komunidad.