Sa unom ka tuig ni PNoy

Tulo ka adlaw na lang ang paaboton ug pormal nang itunol ni outgoing President Benigno Simeon Aquino III ang pagdumala sa Pilipinas ngadto ni incoming President Rodrigo Duterte.

Andam na si Aquino nga mobiya sa Malacañang ug nisaad nga dili mobiya sa nasud, bisan sa mga huhungihong nga sumbalikon siya sa pagpasaka og mga kaso sa mga tawo nga iyang gipapriso tungod sa isyu sa kurapsyon.

Nagpabilin pa sa ilang hospital arrest si kanhi presidente ug karon Kongresista Gloria Macapagal Arroyo, Senador Jinggoy Estrada ug Bong Revilla. Si Senador Juan Ponce Enrile temporaryong gawasnon tungod sa isyu sa panglawas.

Bisan kun nilampos si Aquino sa iyang liderato nga wala mahilambigit sa bisan unsang matang sa kurapsyon nga siya mismo ang nipasiugda, apan wa kini magpasabot nga makalingkawas siya sa mga pangurakot sa iyang administrasyon nga posibleng iyang gitugot aron lang mapahiluna ang mga tawo nga iyang nautangan og kabubut-on tungod sa mga pabor nga iyang gipangayo kanila.

Kahinumduman, usa ka reluctant president si PNoy. Dugay nga nakahukom kun dawaton ba ang hagit ug awhag sa mga Filipino nga modagan sa pagkapresidente, nunot sa mga kabalaka kaniadto nga gustong magpabilin si kanhi presidente Arroyo sa pwesto o kun dili man makabalik sa pwesto ang gipalagpot nga kanhi presidente Joseph Estrada human siya hatagi sa Executive Clemency ni Arroyo sa kasong plunder.

Kun wala pa modagan si Aquino posibleng si Erap ang mapili pag-usab nga presidente sanglit siya maoy ikaduha ni Aquino sa presidential election niadtong 2010.

Apan sulod lang sa pipila ka buwan sa iyang administrasyon daghan na og palpak si PNoy. Nag-una niini mao ang pag-hostage ni kanhi police officer Rolando Mendoza sa usa ka tourist bus nga puno sa mga turista gikan sa Hong Kong. Napatay ang walo kanila ug napatay usab si Mendoza.

Nakadawat usab si Aquino og daghang pagsaway nunot sa giingong dinalidali nga impeachment complaint sa ubos bay balauranan batok ni anhing Supreme Court Chief Justice Renato Corona.

Nabulgar sa iyang administrasyon ang Pork Barrel Scam sa mga kongresista ug senador, lakip na sa mga ahensya sa gobiyerno ug ang iyang pagpakigsuod sa giila nga pork barrel scam queen nga si Janet Lim-Napoles.

Napapas man ang Pork Barrel apan gipulihan kini sa iyang administrasyon sa Disbursement Acceleration Program (DAP) diin gideklarar sa Korte Suprema ang pipila ka aspeto niini nga unconstitutional.

Giingon nga gituyo kini sa pag-umol aron mahatagan ang mga senador ug kongresista sa mga proyekto nga ilang gipangayo bugti sa ilang pagpaluyo sa impeachment complaint batok ni Corona.

Apan mas nilukapa ang acceptance rating sa presidente sa pagkusokuso sa bagyong Yolanda tungod sa kahinay sa aksyon pagtubag sa dakong panginahanglan sa mga nabiktima sa bagyo.

Napun-an kini sa kamatayon sa 44 ka sakop sa Special Action Forces human iyang gitugyan ang operasyon sa pagdakop sa international terrorist nga si Zulkifli Abdhir ngadto sa suspendido nga PNP Chief Alan Purisima.

Apan bisan sa mga bulilyaso, mapasigarbuhon nga ibilin ni PNoy ngadto ni incoming president Rodrigo Duterte ang pangangkon sa lig-on nga ekonomiya sa Pilipinas, mga proyektong infrastraktura, panglawas, edukasyon ug limpyong liderato nga walay mansa sa pangurakot.