Mr. Clean PNoy!

Sa nahitabo nga pagpamatay sa mga nalambigit sa ilegal nga drugas, halos tanan gilambigit sa President-elect Rodrigo Duterte isip pagpangandam sa paglingkod niini sa gahum.

Apan angayan nato nga hinumdoman nga si PNoy pa ang presidente sa nasud hangtod mahuman ang iyang termino sa Hunyo 30. Ang akong nahibudngan nganong nagpakahilom si Presidente Aquino sa isyu sa ginadiling drugas ug sa nahitabong pagpamatay sa mga durugista?

Basin baya kun nakatutok lang kitang tanan kang Digong tungod kay vocal kaayo kini sa iyang baruganan kalabot sa pagpatay sa mga dagkong isda sa illegal drug trade.

Posible nga gisakyan kini sa mga drug protector nga mao ang naningkamot nga mapahilom daan ang mga binuhi nga durugista aron dili na makakanta pa inig lingkod na ni Duterte.

Sukad sa paghingusog sa paggukod sa mga otoridad sa mga durugista wala man sila’y nadakpan nga buhi nga bigtime drug lord. Si Alvaro Alvaro alyas Barok, nakalingkawas sa kamatayon human mitahan sa NBI.

Dili malikayan nga matahap ang publiko sa tinuod nga motibo sa sagunson nga pagtipi sa mga gitumbok nga kriminal. Gani mismo si Digong nakamatikod sa pattern ug nagduda na nga posibleng pahilumon ang mga ginagmay nga durugista aron makalingkawas kun si kinsa man ang nagproteher kanila nga anaa mismo sa gobiyerno.

Kun ingon niini man ang scenario, dili gihapon kalusot ang mga padrino tungod kay anaa na sila sa “pahak” ni Digong. Karon pa lang, nasakpan na ang ilang binuhatan. Sa pagbanaw sa dugo sa mga kriminal, dili angayan nga si Duterte ang targeton sa pagsaway sa Commission on Human Rights ug ubang prolife group, kun dili, si Aquino tungod kay siya pa karon ang presidente sa nasud.

Nagpaka "Mr. Clean" lang si PNoy sa iyang final curtain sa palasyo hinungdan sa iyang pagpakahilom sa isyu.