Ayaw pahigot

Wala’y maayong kabubut-on ang mga Judio ingon man ang mga Samaryanhon. Tungod niini ang mga Samaryanhon dili buot modawat kang Jesus ngadto sa ilang teritoryo. Naglagot ang managsuon nga sila si Santiago ug Juan ang mga “Anak sa Dalugdog” nga nisugyot nga mas maayo tingali nga padad-an sila og kalayo aron mangalaglag silang tanan. Apan gibadlong sila ni Jesus sanglit dili man kini ang matang sa kinaiya nga huptan sa usa ka tinun-an o sumosunod. Ug si Jesus mipadayon nga kun ang tawo mosunod kaniya kinahanglang mamahimo siyang dili mahigot ni bisan kinsa, sa bisan unsa ug sa bisan asa. Apan tawo lamang kita. Dunay mga mithi nga nakapahigot kanato, may mga tawo nga buot mogapos kanato ug may mga dapit diin kita nahimong usa ka binilanggo. Anaa ang discouragement uban ang pagka-desperado. Apan wa kini magpasabot nga wa kay igong padulngan ug wa kay tumong sa kinabuhi nahitabo lamang nga nahimo kang nahikurat ug wa makadawat sa reyalidad sa kinabuhing gusbat.