Pinoy nga nakakuha ogdivorce decree sa Amerika

Dear Atty. Divine,

Nagminyo mi sa akong bana kaniadtong 2000 ug aduna mi duha ka anak. Usa ka tuig gikan sa among pagminyo, milarga ang akong bana sa Amerika ug didto nanarbaho. Matag tuig siya nga mouli dinhi sa Pilipinas. Apan sukad niadtong 2013 wa na siya mopauli hangtod karon ug panagsa na gani mokontak kanako ug sa mga bata.

Ang iyang rason kay busy kuno kaayo siya sa trabaho kay anaa man siya magtrabaho sa hospital. Apan aduna ko’y usa ka friend nga nagtrabaho sab sa America, mitug-an nako nga nagminyo pag-usab didto ang akong bana kay nakakuha kuno kini og Divorce Decree sa among kaminyuon? Pinoy man kining akong bana ug legal ba kining iyang Divorce Decree nga nakuha didto? Mahimo ba kining ipatuman dinhi sa Pilipinas? Daghang salamat.— Sarah

Dear Sarah,

Kun ang imong bana usa ka Filipino, bisan kun makakuha siya og Divorce Decree sa America, dili kini mahimo nga ikapatuman sa Pilipinas kay dili valid ang maong Divorce Decree. Ang Divorce nga gihisgutan sa atong Family Code sa Article 26, kini applicable lang kun ang usa ka Filipino naminyo og langyaw ug human niini ang langyaw makakuha og Divorce Decree sa ilang nasud, ug tungod niini ang Filipino mahimo na nga makaminyo pag-usab kun ma-recognized na sa Pilipinas ang Divorce Decree sa langyaw. Sa imo nga kaso, ang imong bana Filipino man so bisan kun nakakuha siya og Divorce Decree sa Pinay niyang asawa, dili kana niya mapatuman dinhi sa Pilipinas busa magpabilin siyang kasal kanimo. Mahimo nimo siyang ikiha kun makigtipon siya og laing babaye o makigminyo og lain.

Apan kun ang imong bana nahimo na nga American citizen ug dayon mikuha siya og Divorce decree, matud pa sa Korte Suprema, mahimo na nga makaminyo pag-usab ang imong bana ug ikaw nga Filipino spouse mahimo na sab ka nga makaminyo ug mahimong ma-recognize ug ma-enforce sa Pilipinas ang iyang Divorce Decree kay at the time nga mikuha siya niini dili na man siya Filipino Citizen. Kana maoy desisyon sa labaw’ng hukmanan sa kaso nga Republic of the Philippines versus Cipriano Orbecido III (G.R. No. 154380, October 5, 2005, 472 SCRA 114). Thanks and God Bless.- Atty. Divine