EDITORYAL - Kidnapping business

Naghatag og dakong labad sa ulo kaniadto pa kining Abu Sayyaf ug karon nagpadayon gihapon ang ilang paghari sa Jolo ug Basilan, ingon man sa pipila ka bahin sa Mindanao. Hangtod kanus-a kaha mahunong kining problemaha? Unsa kaha nga paagi aron kini sila hingpit nga mapuo? Di pa lang dugay, gibuhian na sa Abu Sayyaf ang Filipinang hostage. Matud pa, dako og papel si President-elect Rodrigo Duterte sa kagawasan niini.

Apan gibuhian man tuod ang maong Filipina, nagpabilin sa mga kamot sa ASG ang Norwegian hostage nga si Kjartan Sekkingtad nga gipangayoan og P300 milyones nga ransom, ug ning bag-o, aduna na say pito ka Indonesian crew sa usa ka tugboat ang gi-kidnap sa grupo.  Kapin usa ka semana na ang nakalabay, gipunggotan sa ulo sa ASG ang duha ka Canadians nga sila si Robert Hall ug si John Ridsdel niadtong bulan sa Abril kay wa sila mohatag og ransom.

Ingon niini na gyud niini ang sistema? Nganong hangtod karon wala pa man gihapon mahurot kining mga bandido bisan sa pagtabang na sa Amerika paggukod kanila?

Gikan sa teknikal nga tabang sa Amerika ug sa mga gamit aron pagbuntog sa ASG, ingon man ang mga bilyones pesos nga infrastructure projects alang sa mga komunidad, wala gihapon sila mapuo. 

Mao kini ang dakong tanghaga, nganong padayon ang paghari sa ASG, may protektor gyud tingali sila nga naa sa gobiyerno nga ang tumong mao lang gyud nga makakwarta.

Nagpasabot nga dili tungod sa kakabus o kakulang og oportunidad nga makatrabaho ang hinungdan.

Gihimo na nga milyones pesos nga negosyo ang kidnapping didto sa Jolo ug Basilan, ug bisan unsa pay buhaton sa gobiyerno pag-address sa problema pinaagi sa hustong paagi, lisud gyud kining puohon.

Busa, ini’g lingkod ni Duterte, kinahanglang usbon ang estratehiya apan kinahanglan nga sa paagi nga dili kini makapasamot sa problema o makapasakit sa mga inosenteng sibilyan.