Kapildehan dawata

Ug natapos na! Humana gyud ang official canvassing sa pagka-presidente ug bise-presidente.

Opisyal na ang pag-ila nila ni presidente Rodrigo Duterte ug vice-president Ma. Lenor  "Leni" Robredo. Tulo ka semana human sa piniliay niadtong Mayo 9, may matawag na gyud kita nga presidente ug bise-presidente.

Alang sa bise-presidente, tam-is ug usa ka malipayon nga kadaogan ang iyang natagamtam tungod kay una, natumong ang pagtapos sa official canvassing sa adlaw sa kasumaran sa natawhan sa iyang nitaliwan nga bana -- si anhing DILG secretary Jesse Robredo.

Ikaduha, bisan sa iyang kabag-o pa sa politika, nilampos siya sa pagpukan sa usa ka higante. Establisado ug may daghang kuwarta ang iyang higpit nga kaatbang nga si Senador Bongbong Marcos.

Taliwa sa daghang pagduda ug sa isang-at unya nga election protest ni Senador Marcos, napamatud-an ni bise-presidente Robredo nga siya ang gihatagan sa mandato sa mga Filipino nga mahimong bise-presidente.

Bisan kun sikit kaayo ang iyang labaw batok ni Bongbong Marcos nga (14,418,817 kontra 14,155,344 botos), apan ang 263,473 botos niyang labaw paigo na nga makapaamgo sa senador sa iyang kapildehan.

Gikuwestyon sa kampo ni Marcos ang kapin tulo ka milyon ka Filipino nga ni-undervote sa bise-presidente.

Siguro tungod kay wala nay laing argumento nga magamit, human gibasura ang ilang pagkuwestiyon sa pag-ilis sa command script sa transparency server nga nidawat sa unofficial count, ang undervoting na usab ang ilang gihimong rason aron malangay ang proseso sa canvassing sa kongreso.

May tikas ba nga nahitabo sa pagkawala sa kapin tres milyones nga botos nga giangkon sa kampo ni Marcos? Pero taym pa usa, sa akong tinamban nga pagkwenta kun sumadahon ang kinatibuk-ang botos nga nipili sa pagka-presidente tali sa lima ka kandidato, may 42,552,335 ka mga Filipino ang nibotar.

Ang may labing taas nga botos sa lima ka kandidato mao si Rodrigo Duterte nga may 16,601,997. Sa pagkabise-presidente may kinatibuk-ang 41,066,384 ang nibotar. Ang labing taas og botos sa unom ka kandidato mao si Leni Robredo nga may 14,418,817 botos, ug gisundan ni Marcos nga nakakuha og 14,155,344.

Suma total, may 1,485,451 lang nga deperensya sa mga wala nibotar sa pagkabise-presidente gikan sa kinatibuk-ang 42,552,335 botos sa pagka-presidente. Diin man og kapin sa tres milyones nga undervotes ang kampo sa mga Marcos?

Sa undervoting, wala usab kana magpasabot nga gikawatan sa iyang botos si Marcos. Simple ra ang buot ipasabot niini, walay napilian ang 1,485,451 ka botante tali sa unom ka kandidato pagka bise presidente. Busa dili makapangangkon si Marcos nga nawagtangan siya og botos.

Hinuon sa matang sa politika dinhi sa Pilipinas duha ray imong kapaingnan. Modaug o gitikasan. Apan hinaot mao ni masabtan ug dawaton sa kampo ni senador Marcos.

Nihukom na ang katawhan ug ilang gihatag ang mandato ngadto ni Leni Robredo. Gisilyohan na sa National Board of Canvassers ang eskotenyo sa pagkabise-presidente ug gideklarar  na nga  si Leni Robredo ang mananaog. Tungod kay nitugot ka nga mopaubos niining maong matang sa proseso, mapaubsanon usab unta ka nga moila sa gahum ug tingog sa katawhan nga maoy nihukom.