EDITORYAL - Digong mag-usab na daw

Misaad si presumptive president Rodrigo Duterte nga magseryoso na siya inig lingkod gyud niya sa posisyon karong Hunyo 30.

Ang gipasabot ni Duterte mao ang iyang mga paukyab nga estorya nga makapalagot sa mga kontra apan makapakatawa sa iyang mga dumadapig.

Naila si Duterte sa mga sakop sa media sa Davao sa iyang pagkawalay panapo kun mopagawas og pamahayag sa bisan unsang isyu. Permanente gyud siyang makapamalikas bisan atubangan sa camera.

Makasakit man kini sa balatian sa uban,  makakatawa usab ang uban sa iyang mga pasumbingay, apan  aduna say makapanimbawot balahibo ilabi na kun ang hisgutan mga kriminal.

Kini nga kinaiya maoy nakaingon nganong gihangop siya sa dul-an 16 milyones ka mga botante aron siya mamahimong sunod nga pangulo sa nasud.

Mipasalig hinuon siyang usbon ang iyang kinaiya.  Nahimo karong tanghaga sa katawhan kun unsa kaha iyang buhaton nga pagbag-o sa kaugalingon nga naanad naman ang mga tawo sa iyang personalidad.

Hinaut lang pud unta nga iya gyud kining usbon, kini tungod kay siya man maoy representasyon sa kinatibuk-ang kapin 100 milyones ka mga Pilipino sa mata sa kalibotan.

Siya usab maoy kanunay makita unya sa mga balita sa telebisyon  nga diin hasta ang mga bata magtan-aw. Unsa na lang kahay ikasulti sa kabataan kun ingon niini ilang makitang kinaiya sa presidente nga mamalikas?

Kun ang mga supporters pay paestoryahon, nalato na sila sa mga lider nga maayo og pustora ug maayong laki mangistorya kay wala gihapoy nahimo.

Karon nga makalingkod na ang klase sa presidente nga ilang gipangita kinahanglan nga suportahan kini aron nga magmalampuson si Duterte paghaw-as sa kahimtang sa mga Pilipino karon.