Brgy Taloot, Argao, Cebu

“Amo lang unta ireklamo kining mga dagkong truck nga giparking diri sa karsada kay kuyaw kaayo sa mangagi nga ubang mga sakyanan maayo unta mabadlong kini."

Brgy Guadalupe, Cebu City

"Sir Jun ako unta ipaapil nimo’g reklamo king nagtipun-og nga mga basura sa sapa sa Doña Cristina Subdivision, Banawa kay grabe na gyud kadaghan. Hangyo lang unta mi nga matabangan gilayon mi pagsulbad niining among problema.”

Brgy Tubigan, Compostela, Cebu

“Nanawagan mi sa among mayor nga unta mahatagan niya’g pagtagad ang problema diri sa among tubigan kay napasagdan lang."

Brgy Tungkil, Minglanilla, Cebu

“Hangyo lang unta kaming mga driver nga sakop sa LITODA nga dakpon o badlongon kining duha ka kolurom nga van nga mamasahero man sila sa Deca Homes kada buntag. Luoy kaayo ang mga tricycle drivers kay wala na intawun mi makuhang pasahero kay gihurot man sa duha ka kolurom nga van.”

Brgy Tingo, Lapu-Lapu City

“Naguol na kaayo kaming mga ginikanan diri sa Bantigue 1 tungod niining computeran diri sa among lugar kay ila man tugotan ang mga bata nga makaduwa. Nanghinaut kaming mga ginikanan nga mabadlong ang tag-iya sa computeran kay hapit na mag-abli ang klase daghan na sad unya ang mga bata ang dili mosulod sa klase.”

Brgy Kampatok, Tabuelan, Cebu

“Naa unta ko’y reklamo sa gitrabahong karsada diri sa among lugar kay gisigehan man og guba pero dugay kaayo gipasemento. Purhisyo kaayo sa mangagi tungod sa kaabog sa karsada, wa pa gani mahuman og trabaho daghan na sab ang nangliki.“

Brgy Buaya, Lapu-Lapu City

“Hangyo lang unta ko sir sa City Health Office diri sa among syudad nga susihon kining nagnegosyo’g lechon diri sa among lugar sa Saac kay bisag asa ra man nila ihawa ang ilang mga baboy mura’g wala ra ba ni moagi inspection.”

Brgy Taytay, Danao City

“Dako kaayo mi’g problema diri sa among lugar Sir kay kapin na intawon usa ka tuig nga wala’y klarong serbisyo sa tubig. Gikapoy nami’g sige hakot gikan sa poso nga pwerteng layoa unya among mga opisyal diri sa barangay wala man gyud magpakabana.”

Brgy Polambato, Bogo City

“Diri sa among barangay kay ang mga miyembro sa 4P's ilang mga ATM card pulos na man gipangprenda sa laing tawo. Pwede ba diay na Sir nga sa gobiyerno man unta ni nga programa nga gipahimuslan sa ubang mga negosyante?”

Brgy Dapdap, San Remegio, Cebu

“Nagmika man ang mga opisyal namo sa barangay labi na sa among kapitan kay wala man gyud makabadlong sa pasugalan diri sa Sitio Gentorehan nga magbuntagay intawon unya ilang pamilya napasagdan wala’y mga kaon sa ilang mga balay maayo unta aksyonan ni nga problema Sir."

Brgy Suba, Cebu City

“Magpatabang unta mi Sir nga masulbad ang problema namo diri bahin niining pagpahabwa sa hugaw sa kanal kay wala man gyud ni lihoka sa mga opisyal namo sa barangay ila ra man labaylabayan ang problema bisa’g niawas na sa agianan ang hugaw gikan sa kanal.”

Alang sa inyong mga reklamo text lang sa 09156203998