Bayani si Marcos?

Gipaboran sa umaabot nga presidente sa nasud Rodrigo Duterte ang pagpalubong sa kanhi diktador Ferdinand Edralin Marcos sa libingan nang mga bayani dili isip usa ka hero kun dili isip usa ka sundawo ug kanhi presidente sa nasud. Ang rason ni Duterte klaro kaayo nga siya mismo wala moila ni Ferdinand Marcos nga usa ka hero. Ang libingan nang mga bayani sa akong pagsabot mao ang lubnganan sa mga bayani busa ang dili bayani wala’y luna niini.

Ang yahoo mihatag og kahulogan sa hero nga siya usa ka simbolo sa kaayo, nagrepresentar sa tanang maayong kalidad sa katawhan, respeto, garbo, kaligdong, hustisya ug sa pagkab-ot sa kalinaw ug kaangayan. Ang hero kinahanglan nga anaa niining tanan nga kalidad. Kun kini ang basihan dili mo-qualify ang diktador nga malubong sa libingan nang mga bayani.

Si kanhi Ferdinand Edralin Marcos usa ka diktador, gipamulta sa hukmanan sa Amerika tungod sa daghang kalapasan sa tawhanong katungod nga iyang nahimo atol sa iyang pamunoan, napulo kapin ka libo ka mga tawo ang gipangpatay, nangawagtang ug wa na igkita hangtod karon apil na niini ang pari sa Redemptorist nga si Fr. Rudy Romano.

Kun ang pagka kanhi presidente ug ang pagka- sundawo sa diktador ang rason sa paglubong kaniya sa libingan nang mga bayani,  di,  adto na lamang pud unta ilubong ang tanang sundawo ug kanhi presidente sa nasud sa libingan nang mga bayani. Sigun sa akong nahibaw-an dili tanang presidente ug sundawo ang gilubong sa libingan nang mga bayani.

Ang libingan nang mga bayani para lamang gayod kini sa mga bayani busa ang paglubong sa diktador sa libingan nang mga bayani magbotang sa katawhan sa kalibog kay nganong may gilubong niini nga dili bayani. 

Kun akoy Rodrigo Duterte dili na lamang nako hilabtan ang kanhi diktador sa iyang nahimutangan karon tungod kay sa akong tan-aw mura’g nakauyon na siya niini tungod kay gawas nga bugnaw kay aircondition hamugaway usab kini.